راكوبة الجريف

السلام عليكم ورحمة الله تعالى وبركاته
كيف حالكم اهلي الجرافة ان شاء الله بخير
طبعا كلنا بنكتب مواضيع وبنشارك وبنتناقش فيها
حبيت اكتب الموضوع دى نفضفض فيو ونتزكر فيو السودان
وخصوصا الجريف واهلنا بالجريف
نعطي فرصة لاقلامنا تكتب بطريقة كلامنا يعني ما باللغة العربية الفصحة ولغة الفلسفة ولغة المواضيع البنكتبة نكتب بلغة البيت بلغة حياتنا اليومية
نكتب وكأننا في كشاشة او راكوبة من الرملة الحمراء مرشوشة بي موية العصر
فيها بنية تفرش في الملايات واطفال في الواطة بيلعبو بالرملة وخالة تعمل في اللقيمات
والشاي جمبها راجل كمل اللقيمات كلها كل دقيقة يشيل واحدة وهناك في الكورنا
في حبوبة بتقلي في البن علشان تعمل القهوة جى جدنا من صلاة العصر شايل عكازو شالو منو الاطفال
يلعبو بيو والاولاد جو من الكورة جو كلهم اجتمعو علشان يشربو الشاي والبنات جايات من الدرس شايلين كراساتهم واقلامهم
كمان جو بي سرعة جابتهم ريحة الليقيمات الواصلة اي مكان... سموها زي ماعايزين تسموها المهم تفهمو قصدي

نتونس فيها ونحكي فيها .. ننسى الجدية ومشاكل الحياة والغربة شوية
نتخيل اننا في الجريف مع الاهل الفقدناهم وفقدنا الونسة معاهم.
اتمنى اكون وصلت المعلومة وتكونو فهمتو قصدي ..