............

حبابك عشره يا زائر
 
الرئيسيةالتسجيلدخول

شاطر | 
 

 من بعض عاداتنا في الجريف شرق

استعرض الموضوع السابق استعرض الموضوع التالي اذهب الى الأسفل 
انتقل الى الصفحة : الصفحة السابقة  1, 2, 3, 4  الصفحة التالية
كاتب الموضوعرسالة
حسن
قلم ذهبي
قلم ذهبي


عدد الرسائل : 803
الاقامة : الرياض- السعوديه بلد المصطفى
المهنة : كيميائي
تاريخ التسجيل : 23/11/2007

مُساهمةموضوع: رد: من بعض عاداتنا في الجريف شرق   الإثنين 11 أغسطس 2008, 5:05 pm

الشفيع الجزولى كتب:

[size=18]
الرائع الشفيع الجزولي مشكور جدا للمرور واثراء البوست فلك التحيه والتجله
.
و ما عارف ليه الناس إتكاسلت من الدفع بآرائهم.

ربما الناس غضت الطرف عن هذه الظاهر الجميله لاسباب ؟؟؟

أبدأ بالقول أن الدور الذى يلعبه أهل العروس فى عُرف الجرّافة ، إرث حنون وعادة حنونة، تجب الحفاظ عليها.
لا أقول الحفاظ عليها كما كانت فى السابق ، بل تطويرها و التطوير إنما يعنى الحفاظ عليها.
ظلّت تلك العادة ،مضرب مثلى الدائم، منذ أن وعيت بمعنى الزواج فى كركوج الحبيبة
وذلك كلما أتى سيرة العرس فى حضورى ، و خاصة إن كان الحضور دناقلة، لأنها عادة
تثير دهشة النوبيين بصفة عامة و الدناقلة بصفة خاصة.

فعلا هذا تميز للناس الجريف شرق ودليل على مدى حبهم للاخرين وتقديس للعلاقه الزوجيه دون باقي العالم

يبدو ليّ يا حسن ، إنو فات عليك أن تلك العادة فيها عدالة طبيعية ، لا شكّ فيها.
أقصد أن أهل العروس، الفقراء مثلا، الذين قد يثيرون شفقتك ، وهى شفقة مشروعة و نبيلة،
والذين عليهم تجهيز العروس مما جميعه علي قولك ، يكون لديهم ولد إما قد تمّ التجهيز له
أو سيتم التجهيز له بنفس المواصفات فى مكان آخر. ففى هذا ، أخذ و عطاء،
يكاد يكون بالتساوى المطلق ، إلا إن كان أحد الناس قد رُزق بإناث أكثر من الذكور،
وذلك ترتيب ربّانى لا شأن لتلك العادة به.
من ناحية أخرى هناك مضامين فى تلك العادة أستطيع الإدِّعاء أنها مضامين فلسفية .
فمثلا،فى هذا النظام تبقى البنت مع أمّها و أخواتها غير المتزوجات أو بعض المتزوجات، ما شاء لها البقاء.
وبالتالي إحتمالات الإحتكاك بينها و بين أهل زوجها تكاد تكون معدومة .
ولا أزيدكم معرفة، إن قلت لكم أن الإحتكاك بين الزوجة و أهل زوجها إحدى أولى أسباب
نكد الحياة الزوجية عندنا وعند شعوب أخرى كثيرة.

العاده فيها عداله طبيعيه ومضامين فلسفيه تؤدي الى تفادي بعض المشاكل الاسريه التي تتولد مع الزواج
اضافه جميله ونظره بعيدت المدى من الاهل .

لكن في هذه النقطه الاخ الخدر قال بتكون بنصف شنب مع نسابتك عكس لما تكون في بيتكم !
.
تعرف يا حسن، عند الدناقلة مثلا، ممكن أمّك تجيك من دنقلا فى السعودية وقد يكون، فى مكّة المكرّمة
أو المدينة المنوّرة، تاخد معاك شهر شهرين وتشاكل زوجتك الإنت راضى بيها ،
و تمش تعمل العمرة أو تَحِج و تسافر. يعنى مثلا بدل "حجّة وتجارة" كما جرى القول ،
بتعمل "حجّة و نِكاية" وأسباب ذلك عند الدناقلة يمكننا التفصيل فيها لاحقا.

شئ طبيعي واحساس من الام تجاه الزوجه التي اخذت الولد بكل خيره مامشكله في النهايه هي الام
وفي انتظار التفاصيل عند حياة الدناقله !

وتلاحظ أننى أضرب المثل بنظام الزواج عند الدناقلة ، لا لإدانته ، بل للمقارنة التى بها تعرف المحاسن.
و السؤال الأهم من كل ذلك ، هل إنتهاء تلك العادة، تحل مشكلة الحصول علي الأرض مثلا؟
لا أظن أن لهذه صلة بتلك ، فمشكلة الأرض فى بلد المليون ميل مربع تظل قائمة
ولها أسبابها، إستمرّت تلك العادة أم إنتفت.

ولماذا لاتكون سبب حقيقي لانتزاع ارضي الجريف المسلوبه

قلت : ام هذه العاده تعتبر احترام واهتمام من اسرة البنت وان تكون تحت رعايتهم

أنا يا أخ حسن أراها كذلك. و لكننى لا أدعو لبقائها كما كانت، فذلك فى واقع الأمر مستحيل.

فالأشياء تغيّرت بأكثر مما توقع أذكى رمّالى . اقول رمّالى ، لأننا من بلدٍ ، ليس من

اليسير فيه القبض علي المنطق الذى تسير به الأمور.

لكن إن كان لنا أنا نتحاور، فاليكن مثلا فى موقف الفتيات العاملات كعنصر جديد علي تلك العادة ،

قِلِ الأراضى أو بالأحرى إستحالة الحصول عليها إلا بالملايين ، عنصر الإغتراب الطويل

الذى لا يعتبر قديما عند أهل الجريف ... الخ من مستجدات لم تكن موجودة عند تَشكّل تلك العادة .

ظهورهذه العناصر الجديدة أمر طبيعى . و لذلك لا يعنى ظهورها إلغاءا لتلك العادة .

الا ترى اخي الشفيع ان هذه المستجدات قد تؤثر على سن الزواج بالنسبه للطرفين ؟

اعتقد بالنسبه للدناقله تاخر الزواج مامشكله عكسنا تماما ..

اتمنى ان لاتضيع هذه العاده وسط هذا الزخم الحضاري والعولمي..


فالعادات مثلها مثل البشر الذين يمارسونها ، حيّة تسير بين الناس و بالتالي تتطور كيفما تطّور الناس.

وأرجو أن لا يفوت عليك أنه ليس بالضرورة أن يكون تطّورا إيجابياً ، فالتطور يحتمل الإيجابى و السلبي.

وما يحدث ، فيما أرى ، هو أن مضمون العادة الإيجابية " التكافل فى حالتنا هذه"

تظل مطلوبة وباقية ما بقى الناس، لكن تتغير أشكال هذا التكافل بظهور تلك العناصر الجديدة،

والتى تختار سبل وطرق إندغامها الإيجابى فى ذلك المضمون.


هذه الخلاصه فعلا وقد اصبت الهدف كيفية المحافظه عليها عن طريق تطويرها فكيف يكون ذلك ؟؟


العجيب الغريب الذى لم يسبقنا إليه أى شعب ، أن معاول الدولة السودانية منذ إستقلالها،

ظلت تعمل علي هدم العادات و التقاليد الجميلة دون رحمة، بدلا من أن تجد طريقها للتطوير و التحسين.

وهذا ما نحتاج التأمل فيه.

اي حكومه عربيه جاءة بتنمية الانسانيه هذا حال الشعوب المستضعفه والمتهضه تحت ظل الحكومات الديكتاتوريه


أرجو لا تكون النقة المكتوبة دى زايدة عن اللازم.

بالعكس اضفت الكثير والمفيد وفي انتظار عودتك فلاتحرمنا



[/size]
الرجوع الى أعلى الصفحة اذهب الى الأسفل
حسن
قلم ذهبي
قلم ذهبي


عدد الرسائل : 803
الاقامة : الرياض- السعوديه بلد المصطفى
المهنة : كيميائي
تاريخ التسجيل : 23/11/2007

مُساهمةموضوع: رد: من بعض عاداتنا في الجريف شرق   الإثنين 11 أغسطس 2008, 5:18 pm

عبدالله محمد نابري كتب:
الراااااااائع الشفيع الجزولي:
افيدكم علما انني وبطبيعة الحال اشعر بالملل من قراءة المشاركات الطويلة ...
ولكن مشاركتك دي لم استطيع التوقف فيها الا عند عبارتك :

أرجو لا تكون النقة المكتوبة دى زايدة عن اللازم.
و لى عودة يا حسن

بالجد اسلوبك سلس ... سلس ... سلس jumping rope jumping rope jumping rope
وكنت اتمنى ان تواصل ...
وتواصل ...
وتواصل ...
فيا ايها السلس ... انطلق فينا كيفما تشاء .. فكلنا حضور وترقب وانتظار...

ملحوظة:
عسى ان لا يطول انتظارنا


الاخ عبدالله سلامات ياخوي

شايفك مهتم بمسالة الزواج ومشاكله انت نويت الحج ولاشنو ؟؟

عندي ليك بوست جميل اتوقعه في الايام القادمه عن المراة والجمال خليك قريب

مشكور للمرور حسن
الرجوع الى أعلى الصفحة اذهب الى الأسفل
حسن
قلم ذهبي
قلم ذهبي


عدد الرسائل : 803
الاقامة : الرياض- السعوديه بلد المصطفى
المهنة : كيميائي
تاريخ التسجيل : 23/11/2007

مُساهمةموضوع: رد: من بعض عاداتنا في الجريف شرق   الإثنين 11 أغسطس 2008, 5:30 pm

sam كتب:
حبيبنا الشفيع لك الود

نحمد الله كثيراً بأن عوامل التعرية الخليجية في العقول لم تقترب منك .. وما زلت محتفظ بحيويتك في الكتابة .. ونشكرك جداً بأن قمت بتنسيط ذاكرتنا التي أصابها الخمول.
وعموماً حديثك الطيب إرجعني بالذاكرة لحديث عمنا عثمان سعيد ( ربنا يمتعه بالصحة والعافية) عندما وجه الدعوة لأخونا عمر محمد نور (أبو الحلقوم) بأن يزوجه دنقلاوية .. ورد عليه عمر بسرعة البديهة عندما قال له نحن المدعومة دي مترددين فيها.. ويا لها من أيام.
كنت أتمنى أن تواصل في حديثك الشيق والممتع والذي أصاب نقاط كثيرة ومهمة .. والأجمل هو تواصلك مع هذه المجموعة الطيبة من الشباب بقيادة أخونا حسن ..
تحياتي .. عصام عبدالصادق
الاستاذ ابو مصطفى عصام

طالما دخلت هذه البوست فلابد من الادلى بافكارك وتحليلاتك ومقترحاتك ودخول الحمام ماذي خروجه !

الاخ الشفيع له الشكر قال لماذا الناس اتكاسلت بآرائها ؟

فدحين صح النوم واعطينا بعض من اسطرك الذهبيه

يلا انعل الشيطان وقل بسم الله

حسن


الرجوع الى أعلى الصفحة اذهب الى الأسفل
حسن
قلم ذهبي
قلم ذهبي


عدد الرسائل : 803
الاقامة : الرياض- السعوديه بلد المصطفى
المهنة : كيميائي
تاريخ التسجيل : 23/11/2007

مُساهمةموضوع: رد: من بعض عاداتنا في الجريف شرق   الإثنين 11 أغسطس 2008, 5:37 pm

ود سنقد كتب:
الشفيع الجزولى كتب:
أبدأ بالقول أن الدور الذى يلعبه أهل العروس فى عُرف الجرّافة ، إرث حنون وعادة حنونة، تجب الحفاظ عليها.
لا أقول الحفاظ عليها كما كانت فى السابق ، بل تطويرها و التطوير إنما يعنى الحفاظ عليها.


ولد دا ..
انا أول مرة أعرف فهم زي دا ..
جل من خلقك وكملك بعقلك وفهمك ..
فعلاً التطور للعادات الجميلة في بلادي يعني الحفاظ عليها من غدر الدهر والمفاهيم المغلوطة ..
وترميمها من كل الشوائب التي تدنسها ..
فهي فكرة نبتت في الأصل بناءص على مفاهيم معينة .. من عقول دأبت على الحفاظ على بناتنا ..
وصونهن وعفاف شبابنا ..
فلهم التحية والتجلة ..
فيا ود الجزولي .. سر في تطوير تلكم العادة التي نفتخر بها نحن الجرافة
ونمتاز بها من دون باقي لمناطق إلا من رحم ربي ..

ودم لنا ولها ...

ود سنقد ازيك يازول عساك طيب

لك التحيه وانت تتابع معنا في هذا الموضوع وعين ساهرا في هذا المنتدي

ربنا يحفظك ويعطيك قدر نيتك فكن دوما قريب

تواجدك يسعدنا ووقود تواصلنا فلك خالص الود

الرجوع الى أعلى الصفحة اذهب الى الأسفل
حسن
قلم ذهبي
قلم ذهبي


عدد الرسائل : 803
الاقامة : الرياض- السعوديه بلد المصطفى
المهنة : كيميائي
تاريخ التسجيل : 23/11/2007

مُساهمةموضوع: رد: من بعض عاداتنا في الجريف شرق   الإثنين 11 أغسطس 2008, 5:50 pm

ود رياء كتب:
انا مع البحب الله والرسول والصحابة وآل البيت و ود بدر والجريف والصبيه الهلال هههههههههههههههههههههههههههههههههه

بخصوص الموضوع أخي الغالي
في السابق كانت والدي وجدي وجدك واهلنا بالجريف ينظرون بأن يسكن الزوج مع اهل زوجته وذلك لكي تسهل عملية الزواج وكان الشباب يتزوجون في سن مبكر .
ولكن الان لا يوجد مال ولا يوجد بيت .
المفروض يكون هو
(الاستمرار في العادة القديمة لكي لا يعزف الشباب عن الزواج )
الحبيب ود ريــــــــــــــــــــــاء

كلنا مع الله ورسوله وصحابته وآل البيت وود بدر والجريف لكن ليس مع الهلال ..

لايوجد مال ولابيت ؟

الشغلانه بقت صعبه شويه لولا ايمانا كان الناس ادبهدلت

قال تعالى تزوجوا فقراء يغنيكم الله

الزمن دا الناس قلبوا الايه بقواء يتزوجوا الاغنياء

نصيحه:

نسوان الكيزان سمان ولامعات ومرطبات فدحين ياخوي

انا مابفسر اكتر من كدا وانت ماقصر واخوك جاهز

كوزه في اليد ولا تفاحه في الشجره !!

هههههه

الرجوع الى أعلى الصفحة اذهب الى الأسفل
عبدالله محمد نابري
قلم ذهبي
قلم ذهبي


عدد الرسائل : 968
العمر : 107
الاقامة : kSA - RIYADH
المهنة : Chief Accounts
مزاجك اليوم :
تاريخ التسجيل : 04/06/2008

مُساهمةموضوع: رد: من بعض عاداتنا في الجريف شرق   الثلاثاء 12 أغسطس 2008, 12:51 am

كتب حسن:
اقتباس :
الاخ عبدالله سلامات ياخوي

شايفك مهتم بمسالة الزواج ومشاكله انت نويت الحج ولاشنو ؟؟

عندي ليك بوست جميل اتوقعه في الايام القادمه عن المراة والجمال خليك قريب

مشكور للمرور حسن

الاخ الجميل حسن :
كيف اكون مهتم بمسألة الزواج وناوى الحج !!
ما هي العلاقة بين الزواج والحج ؟؟؟؟؟
الا اذا كان قصدك الجهاد ..
انا فعلا نويت الجهاد (اقصد الزواج) وعقبال سواق القطر ود ريا ... الزولة ده سائق قطر وفي نفس الوقت القطر فاتو .. فاتو !! وقبال تسالية والهندي وكل العزابة ما عدا الناس القاعده تصوم !!
بالجد بوستك جميل وفي انتظار القادم عن المرأة والجمال..
ذي ما بقولو ناس هارومني الجاي احلى
rap
الرجوع الى أعلى الصفحة اذهب الى الأسفل
http://www.basilholding.com
الشفيع الجزولى
عضو فعال
عضو فعال


عدد الرسائل : 113
تاريخ التسجيل : 10/08/2008

مُساهمةموضوع: رد: من بعض عاداتنا في الجريف شرق   الثلاثاء 12 أغسطس 2008, 2:57 am



عبدالله نابرى

يا زول يا جميل ، شكرا كتير علي التشجيع ووالله إن كُنّا رايعين ، الروعة من عندكم

وإن بقينا ما رايعين ، عدم الروعة يُسأل عنها غيركم.


ويا ود سنقد يا رائع ، قولة ولد دا ! عجبتنى شديييييييييييييييييييييد

تعرف المفاهيم المغلوطة دى سبب بلاوى ما عندها حد. الأدهى، إنو المفاهيم المغلوطة

بجيبوها المتعلمين . دى مفارقة ، مُش كده؟ يعنى الناس العليهم فلفلة المفاهيم و فهمها ، ثم

طرحها بما يتوافق و تقدم المجتمع ، مصطصحبا معها الجميل الموجود، تلقاهم بضللوا فى المجتمع.

وبالمناسبة أنا بسمّى المتعلمين الزى ديل "قليلى المعرفة"

وتعرف ، يا ود سنقد قليل المعرفة لمّن يبقى مفتى ، أخطر منه مافى.


الحبيب عصام

قلت : نحمد الله كثيراً بأن عوامل التعرية الخليجية في العقول لم تقترب منك

القال ليك منو؟

والله حبّة الرّقشة الإنت شايفا دى ، جايا من شدّة الحنين ليكم بس.

صاحبك حاج علي أمبارح إتصل قال إنت كنت معاه فى التلفون ، ما عارف قلت ليهو شنو

داير يشاكل قال لي: داير تتعنصر مع ناس كركوج ولّا شنو؟



ولكم خالص المودة
الرجوع الى أعلى الصفحة اذهب الى الأسفل
وليد عثمان علي سنقد
مشرف
مشرف


عدد الرسائل : 1546
العمر : 41
الاقامة : الجريف أرض الطيبة والطيبين
المهنة : موظف
مزاجك اليوم :
تاريخ التسجيل : 25/02/2008

مُساهمةموضوع: رد: من بعض عاداتنا في الجريف شرق   الثلاثاء 12 أغسطس 2008, 3:23 am


يا ود الجزولي ..
كتر خيرك .. أن قمت بالرد على تعليقي على سردك عاليه ..
ويزيد فضلك ..
فعلاً يا الشفيع ..
أسوأ حاجة في الدنيا لما تكون معتلي أحد المنابر ..
وتعتريك بعض المفاهيم المغلوطة ..
وتقعد ترقص للمنابر .. وتتوه للحقيقة .. وتلقى الناس وراك واهم ضد واهم ..
والشاهد قمر .. مسكين يا قمر .. حيران وسااااهر ..
قواد الحياة لهم كبير الأثر على عقول الناس وإتجاهاتهم ..
بغااااادي .::
ما عيب لو إتعنصرت مع كركوج .. بس العيب يا جزولي لو حقدت على السهم ..

بغادي حبه :
وين خالد ؟؟؟؟


ودم لنا ود الجزولي ...
الرجوع الى أعلى الصفحة اذهب الى الأسفل
الشفيع الجزولى
عضو فعال
عضو فعال


عدد الرسائل : 113
تاريخ التسجيل : 10/08/2008

مُساهمةموضوع: رد: من بعض عاداتنا في الجريف شرق   الثلاثاء 12 أغسطس 2008, 4:41 am



أخونا حسن "سيد الحوش"

إزيّك ياخى

قلت :لكن في هذه النقطه الاخ الخدر قال بتكون بنصف شنب مع نسابتك عكس لما تكون في بيتكم !

كلام أستاذ الخدر ده صاح ، لكن فى ظنى ، مُش عشان إنت مع نسابتك.

قول ليّ كيف؟

تعال نعمل مقاربة لمؤسسة الزواج ، كإتحاد بين إتنين ، بالكيمياء حقتك.

الموية {إتش تو أوو} مثلا ، كإتّحاد ، بين الهيدروجين و الأوكسجين ، بتلقى الصفات بتاعتها

مفارقة لصفات المكونات الإتنين ديل. وده معناه الإتحاد أنتج عنصر جديد كلياً و "نوعياً"

وبنفس الطريقة ، مؤسسة الزواج كنتاج لإتحاد بين إتنين ، ببقى عندو صفات غير صفات الإتنين ديل.

ونحن الرجال عادةً ، بنجتهد إنو الإتحاد ياخذ الصفات بتاعتنا ونحاول صبغه بي صبغتنا ، ونجتهد بنفس القدر

لإبعاد صفات الطرف التانى ، أو بالأحرى الأطراف التانية ، لأنو بعد شوية بجو عيال كنتاج للإتحاد ده.

تعرف برأيئ ، محاولتنا دى ، كرجال ، فى نهاية التحليل هو رفض غير معلن

لشروط الإتحاد و موجبات قضاياه.

فيا صديقى ، إنت مجرّد ما فكرت فى الزواج ، صرف النظر عن موقع سكنك ، اكان مع

نسابتك و لّا مع أهلك و لّا براك ، إنت بقيت بي نُص شنبك ونُص جيبك ونُص شَوفك لي أمك و أبوك

ونص أصحابك ونُص( قِلّة أدبك ولِعبك كمان ههههههههههههههه)

الإتحاد ، اياً كان نوعه ، غالباً ما يكون بي محْض إختيارك ، و بالتالي التنازلات دى طبيعية

لأنها ما تنازلات مهزوم ، فهى تنازلات لصالح شئ أنت جزء منه ،

وفى الوقت نفسه الشي ده أرقى و أعلي منّك كفرد.

ياخى نادي لينا أستاذ الخدر بي جاي.

مع خالص التحايا

الرجوع الى أعلى الصفحة اذهب الى الأسفل
الشفيع الجزولى
عضو فعال
عضو فعال


عدد الرسائل : 113
تاريخ التسجيل : 10/08/2008

مُساهمةموضوع: رد: من بعض عاداتنا في الجريف شرق   الثلاثاء 12 أغسطس 2008, 4:52 am


قلت :والشاهد قمر .. مسكين يا قمر .. حيران وسااااهر ..

ياخيييييييييييييى ده كلام حلو عديييييل

قلت : ما عيب لو إتعنصرت مع كركوج .. بس العيب يا جزولي لو حقدت على السهم ..
هههههههههههههههههههه
الكلام ده وراه كلام ، أنا خايف يكون فى طابور خامس بدأ شغل

بغادي حبه :
وين خالد ؟؟؟؟
يا زول ديل بظهرو بعملو دعاية كدااااااا و بختفو
ياخى صلاح قريب الله ده وين؟
ودم لنا ولهذا المنتدى يا ود سنقد...
[/quote]
الرجوع الى أعلى الصفحة اذهب الى الأسفل
وليد عثمان علي سنقد
مشرف
مشرف


عدد الرسائل : 1546
العمر : 41
الاقامة : الجريف أرض الطيبة والطيبين
المهنة : موظف
مزاجك اليوم :
تاريخ التسجيل : 25/02/2008

مُساهمةموضوع: رد: من بعض عاداتنا في الجريف شرق   الثلاثاء 12 أغسطس 2008, 6:41 am


كلام القمر وشاهد التلاعب بالمنابر والحاجات دي ..
هو فعلاً كلام سمح ..
لكن السمح للسمحين ..
وحتة (التعنصر) لكركوج أوالسهم ..
ماقصدت حاجة وحيات معزة كتابتك السمحة عندي ..
وخالد دا كوم برااااااااااه .. خلي أنا بجيب ليك أتره ..

حتة خااااصة :
جد كدا يا باشا .. المنتدى أصبح له طعم تاني خالص بعد إنضمامك ليه ..
ودا ما كسير تلج .. والعياذ بالله .. بس حقيقة الواحد لازم يمرقها من جوووووووووه ..
ومن باب إعطاء كل ذي حقٍ حقه .. ودا جاء بناءً على تعابيرك الرائعة ..
والتسلسل المنطقي لإبجديات سرد الموضوع .. وتضمين جانب الفكاهة والمرح ..
حتى لا يصيب القارئ بالملل وإعطاء الموضوع شئ من الحيوية ..
جد كدا أسلوبك عجبني شدييييد .. كذا عمنا عصام والخدر ..
ولا أتجرى على أكل حق الباقين ..
إنما لكل منكم وقع خاص أحبتي علينا .. ولكل منكم ميزة ..

ود الجزولي أرح أتكلم لينا شوية عن بوست الرائع حسن ..

ولا تحرمنا ألق الإستماع إلى ما تسطر ..


ودم لنا ولها ...
الرجوع الى أعلى الصفحة اذهب الى الأسفل
بدر عبد الماجد
مشرف
مشرف


عدد الرسائل : 606
مزاجك اليوم :
تاريخ التسجيل : 05/09/2007

مُساهمةموضوع: رد: من بعض عاداتنا في الجريف شرق   الثلاثاء 12 أغسطس 2008, 9:45 am

حسن كتب:
ود رياء كتب:
انا مع البحب الله والرسول والصحابة وآل البيت و ود بدر والجريف والصبيه الهلال هههههههههههههههههههههههههههههههههه

بخصوص الموضوع أخي الغالي
في السابق كانت والدي وجدي وجدك واهلنا بالجريف ينظرون بأن يسكن الزوج مع اهل زوجته وذلك لكي تسهل عملية الزواج وكان الشباب يتزوجون في سن مبكر .
ولكن الان لا يوجد مال ولا يوجد بيت .
المفروض يكون هو
(الاستمرار في العادة القديمة لكي لا يعزف الشباب عن الزواج )

الحبيب ود ريــــــــــــــــــــــاء



كلنا مع الله ورسوله وصحابته وآل البيت وود بدر والجريف لكن ليس مع الهلال ..



لايوجد مال ولابيت ؟



الشغلانه بقت صعبه شويه لولا ايمانا كان الناس ادبهدلت



قال تعالى تزوجوا فقراء يغنيكم الله



الزمن دا الناس قلبوا الايه بقواء يتزوجوا الاغنياء



نصيحه:



نسوان الكيزان سمان ولامعات ومرطبات فدحين ياخوي



انا مابفسر اكتر من كدا وانت ماقصر واخوك جاهز



كوزه في اليد ولا تفاحه في الشجره !!



هههههه




الاخ /حٍٍٍٍٍٍٍٍٍٍٍٍسن bom
إذا قبلتم زوجناكم وما حانحصل رجال أمثالكم (أرمى قدام ورى مومن )
الرجوع الى أعلى الصفحة اذهب الى الأسفل
حسن
قلم ذهبي
قلم ذهبي


عدد الرسائل : 803
الاقامة : الرياض- السعوديه بلد المصطفى
المهنة : كيميائي
تاريخ التسجيل : 23/11/2007

مُساهمةموضوع: رد: من بعض عاداتنا في الجريف شرق   الثلاثاء 12 أغسطس 2008, 3:14 pm

عبدالله محمد نابري كتب:
كتب حسن:
اقتباس :
الاخ عبدالله سلامات ياخوي

شايفك مهتم بمسالة الزواج ومشاكله انت نويت الحج ولاشنو ؟؟

عندي ليك بوست جميل اتوقعه في الايام القادمه عن المراة والجمال خليك قريب

مشكور للمرور حسن

الاخ الجميل حسن :
كيف اكون مهتم بمسألة الزواج وناوى الحج !!
ما هي العلاقة بين الزواج والحج ؟؟؟؟؟
الا اذا كان قصدك الجهاد ..
انا فعلا نويت الجهاد (اقصد الزواج) وعقبال سواق القطر ود ريا ... الزولة ده سائق قطر وفي نفس الوقت القطر فاتو .. فاتو !! وقبال تسالية والهندي وكل العزابة ما عدا الناس القاعده تصوم !!
بالجد بوستك جميل وفي انتظار القادم عن المرأة والجمال..
ذي ما بقولو ناس هارومني الجاي احلى
rap

الحبيب عبدو

سالت عن العلاقه بين الحج والزواج ؟

كلهما فرض

الاثنين بالاستطاعه

مره في العمر ( الزياده فيها اجر )

بعد الحج ترجع كما ولدتك امك يعني حياة جديده وكذالك الزواج

كما ذكرت الجهاد في الاثنين متوفر

في الحج الناس تلبس الابيض وكذلك العروس تلبس فستان ابيض لابد

الاجر العظيم في كلاهما

اللهم سهل لنا امرنا لاكمال دينك وبنى الاسلام على خمسه منها حج البيت

نتمنى لك حج مبرور

الرجوع الى أعلى الصفحة اذهب الى الأسفل
حسن
قلم ذهبي
قلم ذهبي


عدد الرسائل : 803
الاقامة : الرياض- السعوديه بلد المصطفى
المهنة : كيميائي
تاريخ التسجيل : 23/11/2007

مُساهمةموضوع: رد: من بعض عاداتنا في الجريف شرق   الثلاثاء 12 أغسطس 2008, 3:22 pm

بدر عبد الماجد كتب:
حسن كتب:
ود رياء كتب:
انا مع البحب الله والرسول والصحابة وآل البيت و ود بدر والجريف والصبيه الهلال هههههههههههههههههههههههههههههههههه

بخصوص الموضوع أخي الغالي
في السابق كانت والدي وجدي وجدك واهلنا بالجريف ينظرون بأن يسكن الزوج مع اهل زوجته وذلك لكي تسهل عملية الزواج وكان الشباب يتزوجون في سن مبكر .
ولكن الان لا يوجد مال ولا يوجد بيت .
المفروض يكون هو
(الاستمرار في العادة القديمة لكي لا يعزف الشباب عن الزواج )

الحبيب ود ريــــــــــــــــــــــاء



كلنا مع الله ورسوله وصحابته وآل البيت وود بدر والجريف لكن ليس مع الهلال ..



لايوجد مال ولابيت ؟



الشغلانه بقت صعبه شويه لولا ايمانا كان الناس ادبهدلت



قال تعالى تزوجوا فقراء يغنيكم الله



الزمن دا الناس قلبوا الايه بقواء يتزوجوا الاغنياء



نصيحه:



نسوان الكيزان سمان ولامعات ومرطبات فدحين ياخوي



انا مابفسر اكتر من كدا وانت ماقصر واخوك جاهز



كوزه في اليد ولا تفاحه في الشجره !!



هههههه




الاخ /حٍٍٍٍٍٍٍٍٍٍٍٍسن bom
إذا قبلتم زوجناكم وما حانحصل رجال أمثالكم (أرمى قدام ورى مومن )

الاستاذ بـــــــــــــــــدر

والله مابتقصروا ومشكور للمرور والتعقيب

انا ماعندي مشكله كدي شوف ود رياء وعبدالله والهندي وباقي الشباب

وبالمره نعمله زواج جماعي باسم منتدى الجريف بالتعاون مع اخوانا ناس الانقاذ

لكن شرط في عقد النكاح مافي ارمي قدام يعني نحن ماناس جهاد نحن ناس ذكر ودعوه

لك تحياتي

الرجوع الى أعلى الصفحة اذهب الى الأسفل
حسن
قلم ذهبي
قلم ذهبي


عدد الرسائل : 803
الاقامة : الرياض- السعوديه بلد المصطفى
المهنة : كيميائي
تاريخ التسجيل : 23/11/2007

مُساهمةموضوع: رد: من بعض عاداتنا في الجريف شرق   الثلاثاء 12 أغسطس 2008, 10:13 pm

الشفيع الجزولى كتب:


أخونا حسن "سيد الحوش"

إزيّك ياخى

قلت :لكن في هذه النقطه الاخ الخدر قال بتكون بنصف شنب مع نسابتك عكس لما تكون في بيتكم !

كلام أستاذ الخدر ده صاح ، لكن فى ظنى ، مُش عشان إنت مع نسابتك.

قول ليّ كيف؟

تعال نعمل مقاربة لمؤسسة الزواج ، كإتحاد بين إتنين ، بالكيمياء حقتك.

الموية {إتش تو أوو} مثلا ، كإتّحاد ، بين الهيدروجين و الأوكسجين ، بتلقى الصفات بتاعتها

مفارقة لصفات المكونات الإتنين ديل. وده معناه الإتحاد أنتج عنصر جديد كلياً و "نوعياً"

وبنفس الطريقة ، مؤسسة الزواج كنتاج لإتحاد بين إتنين ، ببقى عندو صفات غير صفات الإتنين ديل.

ونحن الرجال عادةً ، بنجتهد إنو الإتحاد ياخذ الصفات بتاعتنا ونحاول صبغه بي صبغتنا ، ونجتهد بنفس القدر

لإبعاد صفات الطرف التانى ، أو بالأحرى الأطراف التانية ، لأنو بعد شوية بجو عيال كنتاج للإتحاد ده.

تعرف برأيئ ، محاولتنا دى ، كرجال ، فى نهاية التحليل هو رفض غير معلن

لشروط الإتحاد و موجبات قضاياه.

فيا صديقى ، إنت مجرّد ما فكرت فى الزواج ، صرف النظر عن موقع سكنك ، اكان مع

نسابتك و لّا مع أهلك و لّا براك ، إنت بقيت بي نُص شنبك ونُص جيبك ونُص شَوفك لي أمك و أبوك

ونص أصحابك ونُص( قِلّة أدبك ولِعبك كمان ههههههههههههههه)

الإتحاد ، اياً كان نوعه ، غالباً ما يكون بي محْض إختيارك ، و بالتالي التنازلات دى طبيعية

لأنها ما تنازلات مهزوم ، فهى تنازلات لصالح شئ أنت جزء منه ،

وفى الوقت نفسه الشي ده أرقى و أعلي منّك كفرد.

ياخى نادي لينا أستاذ الخدر بي جاي.

مع خالص التحايا



الرائع المبدع الهامه الشفيع أزجى تحيه نديه

نشوف راى الاخ الخدر بعد دا نكمل اللكشر ياستاذ

اسلوب جميل ومقنع فلك التحيه خاصة قصة الانصاف البتحدث بعد العرس دي

نثرت الوان وعطرة البوست واصل يامبدع
الرجوع الى أعلى الصفحة اذهب الى الأسفل
معز
قلم فضي
قلم فضي


عدد الرسائل : 330
الاقامة : السعودية/القصيم
تاريخ التسجيل : 09/01/2008

مُساهمةموضوع: رد: من بعض عاداتنا في الجريف شرق   الأربعاء 13 أغسطس 2008, 12:05 am

الاخ الفاضل حسن وجميع الاخوان

السلام عليكم ورحمة الله وبركاته

موضوعك كبير شديد خلالالالالالالالالالالالالالالاص ويحتاج الى مؤتمرات وليس الى نقاش
لكن مسالة تجهيز والد البنت هو مسالة ساعدت كثيرا فى تقليل العنوسة وتقليل سن الزواج بالجريف مقارنة بالمناطق الاخرى واعتقد دى مسالة مهمة جدا جدا ولو نظرتم الى مناطق الخرطوم الاخرى فسوف تجدون ان معدل سن الزواج كبير وفعلا على قول اخونا معتصم انو الاب بيكون عارف انو بنته سوف تتزوج فى الوقت الفلانى فيبداء بالتجهيز ( انا طبعا عند بنتين بديت اجهز من الان خوف ساااااااااااااااااااااااكت من بورة البنات ) لكن فعلا لو انتظرنا انو اى عريس يجهز بيته بيكون داير وقت طويل شديد يعنى مثلا لو واحد فكر فى الزواج وعمره 25 سنة علشان يبنى بيت مستقل ( بقصد مستقل ) يعنى داير ليهو 15 سنة وزيادة سنتين ثلاثة يجهز بيها اغراض الزواج يكون عمره بقى 43 سنة ( واذا الواحد وصل عمره 45 سنة وما اتزوج مفروض ما يتزوج وينتظر الموت فقط لانو الزمن ده الناس بقت تموت فى نهاية الخمسينات )
و بالتالى مسالة تجهيز البيت خففت كتير من تاخير سن الزواج بالرغم من انها بقت هم كبير لاهل العروس لكن اهو الناس امورها ماشة وعلى قول اخونا عمر حسن اصبحت عادة مربوطة باهل الجريف وما اظنها تنتهى قريب يا اخونا خضر
ونقول يا بخت عرسان الغفلة على الاقل لمدة عشرة سنوات
يعنى يا حسن بتحصل بيت انشاء الله لما تتزوج


وفى النهاية المسالة متعادله يعنى الولد لو بقى عليهو التجهيز برضو الاب بيساعده
اذا احسن تساعد البنت لانها هى ال تحتاج الى مساعدة اكثر من الولد

ودمتم للجريف
معز عبد المنعم خالد
الرجوع الى أعلى الصفحة اذهب الى الأسفل
http://aljraif.forumotion.com
حسن
قلم ذهبي
قلم ذهبي


عدد الرسائل : 803
الاقامة : الرياض- السعوديه بلد المصطفى
المهنة : كيميائي
تاريخ التسجيل : 23/11/2007

مُساهمةموضوع: رد: من بعض عاداتنا في الجريف شرق   الأربعاء 13 أغسطس 2008, 5:31 pm

muizk كتب:
الاخ الفاضل حسن وجميع الاخوان

السلام عليكم ورحمة الله وبركاته

موضوعك كبير شديد خلالالالالالالالالالالالالالالاص ويحتاج الى مؤتمرات وليس الى نقاش
لكن مسالة تجهيز والد البنت هو مسالة ساعدت كثيرا فى تقليل العنوسة وتقليل سن الزواج بالجريف مقارنة بالمناطق الاخرى واعتقد دى مسالة مهمة جدا جدا ولو نظرتم الى مناطق الخرطوم الاخرى فسوف تجدون ان معدل سن الزواج كبير وفعلا على قول اخونا معتصم انو الاب بيكون عارف انو بنته سوف تتزوج فى الوقت الفلانى فيبداء بالتجهيز ( انا طبعا عند بنتين بديت اجهز من الان خوف ساااااااااااااااااااااااكت من بورة البنات ) لكن فعلا لو انتظرنا انو اى عريس يجهز بيته بيكون داير وقت طويل شديد يعنى مثلا لو واحد فكر فى الزواج وعمره 25 سنة علشان يبنى بيت مستقل ( بقصد مستقل ) يعنى داير ليهو 15 سنة وزيادة سنتين ثلاثة يجهز بيها اغراض الزواج يكون عمره بقى 43 سنة ( واذا الواحد وصل عمره 45 سنة وما اتزوج مفروض ما يتزوج وينتظر الموت فقط لانو الزمن ده الناس بقت تموت فى نهاية الخمسينات )
و بالتالى مسالة تجهيز البيت خففت كتير من تاخير سن الزواج بالرغم من انها بقت هم كبير لاهل العروس لكن اهو الناس امورها ماشة وعلى قول اخونا عمر حسن اصبحت عادة مربوطة باهل الجريف وما اظنها تنتهى قريب يا اخونا خضر
ونقول يا بخت عرسان الغفلة على الاقل لمدة عشرة سنوات
يعنى يا حسن بتحصل بيت انشاء الله لما تتزوج


وفى النهاية المسالة متعادله يعنى الولد لو بقى عليهو التجهيز برضو الاب بيساعده
اذا احسن تساعد البنت لانها هى ال تحتاج الى مساعدة اكثر من الولد

ودمتم للجريف
معز عبد المنعم خالد

الاســـــــــــــــــتاذ معز عبد المنعم ازيك ياابو الولد

الشئ الشايفنوا دا العاده دي حدها بالكثير عشره سنوات ان الله احيانا وبعد دا

الناس تصبح لهم زكريات لانو مافي ارض والخطه الاسكانيه الجديده لسع في مشاكل

واراض الجريف اتباعت واتقسمت للحكومه والمستجدات الحدثت كما ذكر الاخ الشفيع

كلها اسباب توحي بمستقبل مظلم لهذه العادة التي تميز ناس الجريف

مشكور للمرور تحياتي حسن
الرجوع الى أعلى الصفحة اذهب الى الأسفل
خضر حسن الفضل
عضو فعال
عضو فعال


عدد الرسائل : 274
تاريخ التسجيل : 23/05/2008

مُساهمةموضوع: رد: من بعض عاداتنا في الجريف شرق   الأربعاء 13 أغسطس 2008, 6:02 pm

بسم الله الرحمن الرحيم

الحصة كيمياء
كيمياء الزواج
تعال نعمل مقاربة لمؤسسة الزواج ، كإتحاد بين إتنين ، بالكيمياء حقتك.الشفيع

فى كيمياء الزواج يتم تكسير روابط المواد المتفاعلة { الزوج والزوجة} لإنتاج روابط جديدة وتكوين عناصر جديدة
1/أجمل تفاعلات الكيمياء هى تفاعل الإتحاد حيث يندمج الزوج والزوجة معا ويشكلان شخصية جديدة
وهذا يكون فقط فى حالة العشاق السعداء وهنا يكون الشنب كامل الدسم

2/ تفاعلات الأكسدة والإختزال... حيث ينشأ الصراع بين الزوجين حيث يكسب أحدهما ويخسر الآخر وهنا يكون الخوف يا الشفيع يا اخوى ان تخرج من المعركة بلاشنب وياآآآآآ حليلك
3/ الإنزيمات { الأهل والأقارب }وهى تساعد فى سرعة التفاعلات الكيمائية دون ان تتأثر بنتيجته وتعود فى نهاية التفاعل إلى وضعها الأصلى
وتزداد إذا كنت تسكن مع نسابتك أو اهلك وتقل اذا كنت تسكن لوحدك... ولكن يا الشفيع المحيرنى بالجد الإنزيم الدنقلاوي القلت بجى بالطيارة دا؟؟
تعرف يا حسن، عند الدناقلة مثلا، ممكن أمّك تجيك من دنقلا فى السعودية وقد يكون، فى مكّة المكرّمة

أو المدينة المنوّرة، تاخد معاك شهر شهرين وتشاكل زوجتك الإنت راضى بيها ،

و تمش تعمل العمرة أو تَحِج و تسافر. يعنى مثلا بدل "حجّة وتجارة" كما جرى القول ،

بتعمل "حجّة و نِكاية" وأسباب ذلك عند الدناقلة يمكننا التفصيل فيها لاحقا. الشفيع

وخلى بالك من شنبك
ودمتم لنا
خضر حسن
الرجوع الى أعلى الصفحة اذهب الى الأسفل
محمد حسن الفضل
عضو جديد
عضو جديد


عدد الرسائل : 10
الاقامة : المملكة العربية السعودية
المهنة : محاسب
تاريخ التسجيل : 09/08/2008

مُساهمةموضوع: رد: من بعض عاداتنا في الجريف شرق   الخميس 14 أغسطس 2008, 3:21 am

الجريف والطوبيا هذا عنوان للدخول في موضوع السكن مع أهل الزوجة .ما أجملى أن تتدالوا هذا الموضوع الشيق والمميز لأهلنا بالجريفات الشرقية وحقيقة موضوع هام جدا الواحد لو نظر بتمعن شديد يجد أن موضوع السكن مع أهل الزوجة له فوائد عديدة وله سلبيات ( ودي هي طبيعة الأشياء في هذا الكون وسره) فلكل فعل رد فعل ولكل سالب موجب واتبع السيئة الحسنة تمحوها .
من إيجابيات أن تسكن الزوجة مع أهاها فالحياة الزوجية تحتاج إلى توجيه خصوصا البنت وأفرب شخص يوصل المعلومة الصحيحة للبنت هي الأم ( أم الزوجة ) والأم تقوم بدور المعلم والمرشد لبنتها بأسرار الحياة الزوجية وفن التعامل مع الأزواج وكل الأساليب الضرورية لإستمرارية الحياة الزوجية .
أنا شخصيا من أنصار هذا المبدأ ولعل لإهلنا حكم كثيرة وكبيرة في تطبيق ذلك المبدأ.
طبعا أنا أبو بنا ت ومن الجريف لازم أسلك ذلك الطريق .
لكن المثل الطروح ( كوزة في اليد ولا تفاحة في شجرة ) مثل جميل جدا وهذا من واقع السودان الحالي .لكم الشكر لطرح مثل هذه المواضيع الهامة .
الرجوع الى أعلى الصفحة اذهب الى الأسفل
حسن
قلم ذهبي
قلم ذهبي


عدد الرسائل : 803
الاقامة : الرياض- السعوديه بلد المصطفى
المهنة : كيميائي
تاريخ التسجيل : 23/11/2007

مُساهمةموضوع: رد: من بعض عاداتنا في الجريف شرق   الخميس 14 أغسطس 2008, 2:11 pm

محمد حسن الفضل كتب:
الجريف والطوبيا هذا عنوان للدخول في موضوع السكن مع أهل الزوجة .ما أجملى أن تتدالوا هذا الموضوع الشيق والمميز لأهلنا بالجريفات الشرقية وحقيقة موضوع هام جدا الواحد لو نظر بتمعن شديد يجد أن موضوع السكن مع أهل الزوجة له فوائد عديدة وله سلبيات ( ودي هي طبيعة الأشياء في هذا الكون وسره) فلكل فعل رد فعل ولكل سالب موجب واتبع السيئة الحسنة تمحوها .
من إيجابيات أن تسكن الزوجة مع أهاها فالحياة الزوجية تحتاج إلى توجيه خصوصا البنت وأفرب شخص يوصل المعلومة الصحيحة للبنت هي الأم ( أم الزوجة ) والأم تقوم بدور المعلم والمرشد لبنتها بأسرار الحياة الزوجية وفن التعامل مع الأزواج وكل الأساليب الضرورية لإستمرارية الحياة الزوجية .
أنا شخصيا من أنصار هذا المبدأ ولعل لإهلنا حكم كثيرة وكبيرة في تطبيق ذلك المبدأ.
طبعا أنا أبو بنا ت ومن الجريف لازم أسلك ذلك الطريق .
لكن المثل الطروح ( كوزة في اليد ولا تفاحة في شجرة ) مثل جميل جدا وهذا من واقع السودان الحالي .لكم الشكر لطرح مثل هذه المواضيع الهامة .
الاستاذ الجليل محمد حســـــن الفضل اسعد الله اوقاتك

ومتعك الله بالصحه والعافيه جزيل الشكر لمرورك والتعقيب

مادعاني لكتابت هذا البوست الوضع الحالي للجريف والتغيرات الكبير التي حدثت والوضع الاقتصادي المتردي
والظلم والنهب الذي يحدث لاراضي الجريف في مراى ومسمع من الجميع والكل واقف ينظر وفي بعض الاحيان يغض الطرف يعني يعمل فيها ماشايف وكماذكر الاخ عمر حسن في تعقيبه الناس تريد ان تطمس هوية الجريف
وعاداتها ..وكدي انظر حوليك او شوف موضوع الاخ عبدالله نابري (الجريف اتباعت) او موضوع ود سنقد مقابر ناصر او موضوع الاستاذ بدر والكثير الكثير ..

بالجد مرورك اسعدنا فلك التحيه والاحترام
تحياتي حسن
الرجوع الى أعلى الصفحة اذهب الى الأسفل
الشفيع الجزولى
عضو فعال
عضو فعال


عدد الرسائل : 113
تاريخ التسجيل : 10/08/2008

مُساهمةموضوع: رد: من بعض عاداتنا في الجريف شرق   الجمعة 15 أغسطس 2008, 10:59 am



الإخوة الأعزاء

وددت لو أن مشاركة أخونا الخدر والأخ معز عبدالمنعم شملت تأثير العناصر التى أسميتها جديدة

علي تلك العادة ، مثل الفتاة العاملة أو الإغتراب .

القصد أن أقول أن التركيز ،علي عنصر إنعدام أو غلاء

الأرض ، وكأنه العنصر الوحيد المؤثر علي تلك العادة ،غير كافى.

أخونا حسن كتب :

شئ طبيعي واحساس من الام تجاه الزوجه التي اخذت الولد بكل خيره مامشكله في النهايه هي الام
وفي انتظار التفاصيل عند حياة الدناقله !

وأخونا أستاذ الخدر إحتار قائلا:

الشفيع المحيرنى بالجد الإنزيم الدنقلاوي القلت بجى بالطيارة دا؟؟

- مغادرتك لأهلك وبيتكم ، بالزواج يعنى ، بكون من دواعى ردود أفعال شتى من ناس بيتكم.هذا معلوم.

ردود الأفعال دى ممكن يكون واحدة من أسبابها عاطفى .

زي مثلا فى الصباح يلقو المحل الكنت بتنوم فيهو فاضى . يتذكّروك و يحنو ليك.

وقد يقولو ، يا حليلو الليلة نام كيف؟

وهناك ردّ الفعل البكون سببو إقتصادى ، يعنى الدور الكنت بتلعبو فى عيشة ناس بيتكم .

والدور الإقتصادى فى ردّ الفعل، كان كبير فى كل الأوقات، ومازال.

عند الدناقلة، منذ القِدم و حتى الآن ، الولد أول ما قِوى عودو حبّة أو تخرّج من قراية وبدأ يشتغل،

يجد أهله ، مهما يكن ، فى حوجة له ، فالأب تزوج فى سن كبيرة .

ونادر جدا أن تجد أسرة دنقلاوية فى غير حوجة لدعم إقتصادى من ولدهم.

البحصل إنو أغلب الناس ، الواحد فيهم بخدم أهلو علي أقل تقدير خمسطاشر سنة و فى ناس أكتر من عشرين سنة.

ثم من بعد يتزوج . و بطبيعة الحال لا يجد اى دعم يذكر منهم . و بزواجه بالطبع يقل دعمه المالى

لهم أو قد يتوقف كليا . لذلك ال shock عند الدنقلاوية بكون كبير شديد.

الغريب أنك قد تكون مشيت للزواج بعد تسليمك الراية لأخ بعدك أو حتى لإتنين أخوان .

بعد ده كلو، قد لا تستوعب الأم إنقطاعك عنّهم .

أما بالنسبة للأم الجرّافية ، حتى وقت قريب ، كان ممكن يحدث إنو ولدها يتزوج بدون ما هى تكون

شافت منه أى دعم مادى . وقد كان يحدث أن لاتكون هناك حوجة لدعم هذا الولد من الأصل ، إذ ينشأ الولد

ويجد أبوهو شايل حيلو و شغال .

أضف إلي ذلك زمان كان فى، المفهوم بتاع "الصبى"، حتى مشْورة ما عندو و لا يُركن إليه فى شئ .

وده كان لحد كبير ربط ، لمدى إعتبارك زول مسئول ورجل كامل ، بزواجك .

صحيح أنك الآن تجد الشباب فى خدمة أهلهم قبل الزواج و ده قد يكون من المستجدات التى قد تؤدى

لتأخير سن الزواج عند الجرّافة ،كما هو حادث عند الدناقلة مثلا.

وده فى نهاية المآل ،قد يوْصِل عنف الأم الجرّافية لمستوى عنف الأم الدنقلاوية.

وأكيد بنجئ راجعين

خارج النص:

يا ود سنقد ما لقيت ليّ صلاح قريب الله ياخى؟

الرجوع الى أعلى الصفحة اذهب الى الأسفل
خضر حسن الفضل
عضو فعال
عضو فعال


عدد الرسائل : 274
تاريخ التسجيل : 23/05/2008

مُساهمةموضوع: رد: من بعض عاداتنا في الجريف شرق   الجمعة 15 أغسطس 2008, 1:58 pm

بسم الله الرحمن الرحيم
الأخ الشفيع :ــ
ياسلام عليك على الطرح الهادئ انا فى الحقيقة معجب جداً بتكاتف أهلنا الدناقلة وتعاونهم مع بعض داخل الأسرة والواحدة وما بين الأسر فى الحى ونتيجة لذلك التعاون والتكاتف تجدهم كلهم بالتقريب يعيشون فى مستوى إجتماعى واحد... وكذلك سرعة تأقلمهم مع كل المجتمعات وربما يكون سبب ذلك انهم أول سفراء شعبيين للسودان بالخارج .
بخصوص الصراع بين أم الزوج والزوجة مع ملاحظة انه لايوجد صراع بين الزوج وام الزوجة
إذن الصراع هنا صراع نسائي ناشئ من طبيعة المرأة حيث ان النساء يعيشين فى تنافس دائم مع بعضهن وكما قلت ان الأمهات ينتظرن عائد تربيتهن لأبنائهن ولكن أن تقطف الثمار إمراة اخرى؟؟ فهنا تكون معركتها الكبرى... حتما ليس كل النساء على هذه الشاكلة ولكن مهما كانت أم الزوج فهى تشكل هاجس للزوجة لاحظ ان القرآن الكريم يقول <ووصينا الإنسان بوالديه> لأن البعض فى غمرة انشغاله بأسرته ينسى حوجة أهله العاطفية كانت ام المادية إليه... وهنا يظهر دور الزوجة الصالحة .
ومن المفارقات ان الإبن عندما يكون باراً باهله لايشجعونه على الزواج وعندما يكون مستهتراً نجد أن كل العائلة مهتمة بتشجيعه على الزواج لعل الزوجة تعيده للصراط المستقيم؟؟
ولنا عودة بإذن الله لمناقشة الزواج من المغتربات أو العاملات
ودمتم لنا
خضرحسن
الرجوع الى أعلى الصفحة اذهب الى الأسفل
الشفيع الجزولى
عضو فعال
عضو فعال


عدد الرسائل : 113
تاريخ التسجيل : 10/08/2008

مُساهمةموضوع: رد: من بعض عاداتنا في الجريف شرق   الجمعة 15 أغسطس 2008, 2:48 pm



أستاذ الخدر

سلامات

كتبت:

ومن المفارقات ان الإبن عندما يكون باراً باهله لايشجعونه على الزواج وعندما يكون مستهتراً نجد أن كل العائلة مهتمة بتشجيعه على الزواج لعل الزوجة تعيده للصراط المستقيم؟؟

شكرا علي إيرادك للنقطة المهمة جداً دى ، دى مفارقة فعلا مذهلة و هى موجودة تقريبا عند السودانيين عموم.

وهى فى إحدى معانيها تدل علي إذدواج المعايير عندنا " السمح لينا و الكعب للآخرين" .

صحيح إنو القصة ليست بعنف الجملة بتاعتى دى ، لكن تحتملها، لأنو فيها إستصحاب لمفهوم "يتخارجو من المستهتر ده"

وإذدواج المعايير عند السودانيين موضوع ذو شأن، ممكن نناقشو فى بوست آخر .

بقول كده لأنو هنا بفضّل التركيز علي الموضوع الأساس "عادة تجهيز العروس من جانب أهلها فى عرف الجرّافة"

من ناحية تانية الملاحظة دى،برضو فى إحدى معانيها، دلالة على ان مؤسسة الزواج يمكن أن تقوِّم المِعْوج ، وهى كذلك بالفعل.

كتبت أيضا:
ولنا عودة بإذن الله لمناقشة الزواج من المغتربات أو العاملات

فقط أنبّه لأننى لم أقصد الزواج من المغتربات أو العاملات علي إطلاقه ، قصدت القول

أن "الفتاة العاملة" عنصر جديد لم يكن موجودا عند تشكّل العادة التى نحن بصددها

بل لم يكن موجوداً حتى زمان قريب مضى .

وكذلك عنصر "الإغتراب" أيضا ليس قديم عند الجرّافة ، وحتى الإغتراب الداخلى لم يكن كثيرا

وبالتالى أيضا عنصر جديد علي تلك العادة.

ودعوتى ،أن نرى تأثير العناصر دى وعناصر أخرى، قد يذكرها الأخوان، علي تلك العادة.

مداخلتك جميلة ياخى .
الرجوع الى أعلى الصفحة اذهب الى الأسفل
حسن
قلم ذهبي
قلم ذهبي


عدد الرسائل : 803
الاقامة : الرياض- السعوديه بلد المصطفى
المهنة : كيميائي
تاريخ التسجيل : 23/11/2007

مُساهمةموضوع: رد: من بعض عاداتنا في الجريف شرق   الجمعة 15 أغسطس 2008, 4:47 pm

النجمان الساطعان في سماء هذا البوست الخدر والشفيع لكم التحية


بالنسبه للعناصر الجديده التي ظهرت على الساحه الزوجيه في عرف الجريف الفتاة العامله
والاغتراب كماذكر الاخ الشفيع نبداء بالاولى طبعا زمان ماكان في بنت بتعمل مهما كانت ظروف اسرتها , وبالنسبه لزوجها التكافل الاجتماعي بقوم بالواجب هذا صفه من صفات اهل الجريف .. في الوقت الحالي الفتاة العامله في نظر الاغلبيه مراة جاهزه للحياة الزوجيه بمعنى لديها مصدر رزق وبالتالي يمكن ان تقلل من متطلباتها الخاصه وهذا مكسب للرجل .. وكذلك لديها خبره في الحياة اسريا واقتصاديا يعني قصة تكون معا امها في سنه اولى زواج مامنها فائده لانها عارفه كل شئ ( بالبلدي مفتحه ) الاخ تساليه في مخرجه لهذا البوست كتب ياقماري ابني عشي قشه قشه في هذه الحاله الزوجه ممكن ان تساعد في بناء العش لكن لا يمكن ان تشتري عش (ارض ) الا ان تكون بتعمل في منصب مرموق او كوزه لان متوسط الرواتب معروف في السودان ..
العاملان الاساسين لبيت الزوجيه الارض والتجهيز من بناء وفرش
الاخ الشفيع كتب :القصد أن أقول أن التركيز ،علي عنصر إنعدام أو غلاء
الأرض ، وكأنه العنصر الوحيد المؤثر علي تلك العادة ،غير كافى.

في اعتقادي ان الفتاة العامله ليس لديه تاثر كبير يذكر في اختفاء او استمرارية هذه العادة اللهم الا المساعده التي تقدمها لوالديها من فرش ومستلزمات اخرى..
اما عنصر الاغتراب ندع فرصه لباقي الاخوان ..
ولي عوده
الرجوع الى أعلى الصفحة اذهب الى الأسفل
معز
قلم فضي
قلم فضي


عدد الرسائل : 330
الاقامة : السعودية/القصيم
تاريخ التسجيل : 09/01/2008

مُساهمةموضوع: رد: من بعض عاداتنا في الجريف شرق   السبت 16 أغسطس 2008, 1:15 am

اخونا الفاضل الشفيع

تحياتنا لك ولكل اهلنا الدناقلة مغتربيين ومحليين
عزابة ومتزوجين
بالنسبة لموضوع البنت العاملة او تاثير الاغتراب هذا يحتاج لبوست لحاله
وهو موضوع كبير اتمنى ان تطرحه فى المنتدي لكننا ركزنا اكثر على موضوع الارض و التاثيث لانهم هم سبب الموضوع
لذلك نرجو ان تطرح الموضوع باسلوبك الرائع الذى يجبرنا على قرائته من اول حرف لاخر حرف صراحه تنفع تكون صحفى
مش صحفى فقط لكن صحفى وكوز كمان
هههههههههههههههههه
مع تحياتنا لك وتحيات عمر حلقوم كمان
معز عبد المنعم خالد
الرجوع الى أعلى الصفحة اذهب الى الأسفل
http://aljraif.forumotion.com
 
من بعض عاداتنا في الجريف شرق
استعرض الموضوع السابق استعرض الموضوع التالي الرجوع الى أعلى الصفحة 
صفحة 2 من اصل 4انتقل الى الصفحة : الصفحة السابقة  1, 2, 3, 4  الصفحة التالية

صلاحيات هذا المنتدى:لاتستطيع الرد على المواضيع في هذا المنتدى
............ :: المنتديات الرئيسية :: الجريف شرق-
انتقل الى: