............

حبابك عشره يا زائر
 
الرئيسيةالتسجيلدخول

شاطر | 
 

 قصة ريا وطه

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
حافظ العبيد الطاهر
قلم ذهبي
قلم ذهبي


عدد الرسائل : 513
تاريخ التسجيل : 28/10/2007

مُساهمةموضوع: قصة ريا وطه   الخميس 03 يناير 2008, 8:43 am

الملحمه .... قصه سودانيه وقعت في باديه البطانه السودانيه.
مـنـقـول
تروي الروايات ان هذه الواقعة وقعت حوالي عام 1818 ميلادية وكانت الواقعة الشهيرة بقتل احد فرسان البطاحين حمد ود دكين زعيم الشكرية واحتمي البطاحين بابناء عمومتهم الجعلين وعلي راسهم المك نمر وكادت الحرب تقع بينهم ولكنها انتهت الي الصلح
وصور الشاعر الكبير ابراهيم العبادي هذه الواقعه مع اضافات ادبيه جمه ومحشنات افضت بها الي مسرحية شعريه بقت اثر عظيم لتلك الواقعة التي تناسي التاريخ سببها الاصلي وبقيت ابيات الشعر والحان القوافي ......

الحلقه الاولى

قال طه :
أخوك يا ريا اخوك وكت الخيول بدبكن
أخوك يا ريا اخوك وكت الرماح يتشبكن
اخوك جبل الثبات وكت القواسي بحبكن
كم بكيت وكم قشيت دموع الببكن
قالت ريا
وراك اسود علي ما نمت اسع طيب
قل طه
بسم الله قولي اخوك طيب
نصيح وشديد حاضر قلبي ماهو مغيب
إلا الشفتو في النوم من هوايله يشيب
الزول في الصحي مخدوم عليه شقاهو
وإن غمض شويه تجي الهموم لاحقاهو
الصف ابلبوس انا ما بخافو لقاهو
ياليت الحلم في صحيا كان بلقاهو ...
كان خيرولا شر بلقاهو ما بهم بالى
وحارسنى السبات من الكبار قبالى
وكت هسع صحيت وشفتك سالمه قاعده قبالى
ان اتلخبت الكون مانى مبالى

قالت ريا
كعب نوم النهار أمس العصير كنت نايمه
رأيت قدام الفريقنا أشوف صقوراً حايمه
كبيرن غار علي من نومي تبيت قايمه
صحيت مهجومه لا مفصل ولا في القايمه

قليها طه :
وانتي كمان رأيتي صقور عباره غريبه
علامتا كافية ظنيت الحكايه قريبه
هاك مني الصحيح الما بتدخلو الريبه
هادي الحله بي عيني أشوف تخريبه

قالت ريا
تف الشينه ليه فاجعني ليه يا طه
انت الدغري وانت الكاشفه ياك غطاها
كان الدنيا هادي العقبة تتخطاها
ما بضلل سماها وما ابتشيلني وطاها

وقعدت ريا تبكي
رد عليها طه وقال
ما بفيد البكاء وكلامي احسن تنسي
قالت ليه ريا
كيف ما ابكي وكيف افوت مراتع انسي
افقد كل شي عزي ورجالي وانسي
تطلق فوقي نار عقبان تقول لي انسي ..
الرجوع الى أعلى الصفحة اذهب الى الأسفل
الهندي بشير نابري
قلم ذهبي
قلم ذهبي


عدد الرسائل : 2809
الاقامة : المملكة العربية السعودية - الريــاض
المهنة : Computer programmer
مزاجك اليوم :
تاريخ التسجيل : 08/09/2007

مُساهمةموضوع: رد: قصة ريا وطه   السبت 12 يناير 2008, 6:46 am

الموضوع قمة في الروعة يا حافظ وانا قبل كده كانت عندي القصة كاملة
وقريتها كلها واستمتعت بيها فعلاً .. وهي تصور لنــــا زمنا من الماضي الجميل
لأهلنا وناسنا وأصبحت الآن تراث ... وتم تصويرها فعلا بنغم موسيقى عجيب على
يد الرائع ابراهيم العبادي .. لك ودي وامتناني وياريت نبحث سوا عن القصة كاملة وتفاصيلها
والتسجيل الصوتي لكل القصيدة



عدل سابقا من قبل في الخميس 17 يناير 2008, 4:03 am عدل 1 مرات
الرجوع الى أعلى الصفحة اذهب الى الأسفل
http://aljraif.forumotion.com
حافظ العبيد الطاهر
قلم ذهبي
قلم ذهبي


عدد الرسائل : 513
تاريخ التسجيل : 28/10/2007

مُساهمةموضوع: رد: قصة ريا وطه   السبت 12 يناير 2008, 8:28 am

عزيزى الهندى لك كل الشكر للمرور نحن فى غاية الشوق لتلك الحكاوى الجميلة والتى تعكس وجه السودان والشخصية السودانية المثالية التى نحبث عليها فى هذا الزمن الاغبر وانشاء الله نجد الشريط وهو يعكس تراث اهلنا من الجريف الى القضارف ولك كل التحايا
الرجوع الى أعلى الصفحة اذهب الى الأسفل
حافظ العبيد الطاهر
قلم ذهبي
قلم ذهبي


عدد الرسائل : 513
تاريخ التسجيل : 28/10/2007

مُساهمةموضوع: رد: قصة ريا وطه   الأربعاء 16 يناير 2008, 9:08 am

الحلقة الثانية من قصة طه وريا
وتقوم ريا فايته علي الفريق وطه يعاين فيها وهي ماشه ويقول
ياليت السعادة ان كان بقت بيديه
كنت اعيش غني في الدنيا بالزنديه
علي حكموا ناسي الفى اخذوا الديه
اموت بالعطش والمويه بين ايديا
آه يا ريا قاسيه وزايده فى التفنين
اه يا رب ارحم صبري امس ضنين
يمحق ديه السنه ربي الحليم وحنين
يخصمه من حياتي رضيت بعشرة سنين
كيف أتهن واعيش وانا صبرى ولاّ مودع
وسبب الرخرخ المن قام صغير متفدّع
جنيت وجنى جنّ وحالى اصلُ مبدّع
اهج فى الجيش اهج فاضلى تانى أجدع
وهنا ريا داخله علي الفريق لاقوها خمسة عرب راكبين زواملم " وده بداية الحلم الشافتوا ريا وشافوا طه "
العرب قربوا من ريا قام واحد من العربان المع ود دكين شيخ العرب نادي ريا وقال
بالضيفان تمري لا سلام لا كلام
صدقوا اهل المثل توب العرب صح لام

ردت عليه ريا
حبابكم عشرة ومن دون كشرة والف سلام
يا وجوه العرب المتلي ما بتلام
انا بت الرجال اهل الدرق والسيف
بت الما بهموا بي حساب الخريف والصيف
بت البحجو لى المرقوب بكرموا الضيف
انا ريا كان شفتكم افوتكم كيف
قام العربي قال ليها
من وين في الاهل كفاك فخر يا بنية
ردت عليه ريا
انا بت البيوت المن بعيد معنيه
بى فوق السما نفوسنا وبيوتنا حنيه
انا بت ابكبس في النسبه بطحانيه
قام رد عليها ود دكين طبعاً عرفها انها هي زولتوا العاوز يعرسه زاته فقال
عبد الله ابكبس عز البطانه وفخري
في راس العرب بنعد ماهو الوخري
كريم وهميم كان للقبائل دخري
بت شيخ العرب هيلك صحيح تفتخري
توقد ناره ديمه الما بكوس الجمره
وفي الضيفان يهوش سكينو دايماً حمره
بي كاس ما عبر لبنو بيجيك بالعمره
هيلو الشكرة هيلو الرئاسه هيلو الامره
المرحوم ابوك كان للقبيله غطاها
عزك قديم عمك حسين ابو طه
ان شاء الله اخوك ديه السكه ما تخطاها
بقصد بيها ود عمها طه يعني هل هو في مكانه ابواتوا(دايره تديه كلمه ناقصه فى ودعمها(فردت عليه ريا قايله
كما يسد مكانن قدموا ليش يوطاها
) يعني ماشي في الواطه ليشنو غير اكرام الضيف واغاثة الملهوف(لا يفوت ولا يموت الساحتو يوم مغشيه
تقابة الفريق يوقد صباح وعشيه
زايد في الرجال طالق قفاي ووشيه
ضيوف الليل يكفيهم مرارة وشيه


رد عليها و دكين
ما دخل التراب البركه في الذريه
والخلاك وراه ما بقولوا مات يا ريه
دايما في القبائل سيرة ابوك مطريه
بيكي وبي اخوك تزيد ودى المحريه
قام واحد من العرب داير يعرفا انه ده شيخ العرب ود دكين فقال :
ما بتسألي لامن وين ولا وين ترسو
قالتلوا ريا
كيف العربي يسأل ضيفو كيفن تنسوا
أول بكرموا ويخابروا ساعة أنسو
من مقلب حديث يعرف أبوه وجنسوا
فرد عليه العربي
عملتي حسابو ضيفك وكرموا وجبتيه
يخجل كان سألتي وإسمو ما عرفتيهو
إسم شيخ العرب سامعابو ما شفتيه
)داير يوريها بان حمد ودكين دا راجل غنى وراجل كذا وكذا..عشان تقبل بيه(
ده خريف البطانه الفيها مالوا مشارك
هيلوا السارحه هيلوا الصاهله هيلوا البارك
ما وقع لك كلامي ساكته لي شنو خبارك
فخرك ود دكين جاك في فريقك زارك
ردت عليه ريا
مرحب حبابو العزو ماهو لفايه
اب ناراً تولع للضيوف دفايه
بي شيخ العرب الإفتخار ما كفايه
تابعو إنت جانا نفخربو ونخدموا حفايه
رد عليها ود دكين
بارك ربي فيك عقلك يدوم يا ريا
كرمك ماهو كلفه ديه طبعتك فطريه
إياك بت التلوب والسمته فيك محريه
قديم فوت البطاحين عزه للشكريه
في الوقت داك جاء طه ووجدتهم واقفين فقال :
مرحبتين حباب مرحب خريفنا الزارنا
حباب شيخ العرب اتشرفنبوا ديارنا
حباب راس العرب البيهو كل مدارنا
تنزلوا في الدرب مالنا ماتت نارنا
رد عليه شيخ العرب
حباب طه الضرس والفي الصهيباب راس
الجود والكرم هيلك قديم ميراس
نارك ما بتموت با ولده الفراس
قاصدين ام شديده ومعانا عوجه راس
رد عليه طه
لعدوك العوج يا الفي الكبس سراي
راسك ما بدوس مليان رجاله وراي
باكر لي ام شديده بركب معاك براي
يا شيخ العرب لاكن تختوا كراى
طبعاً شيخ العرب ما فهم كلمة كراى ديه فقال لي طه ..............
هادي الشورة يا طه الغلبني دليله
كل اللبزمه القاهو فيك قليله
رد عليه طه شارح ليه كلمة كراي
كراي الدايروا تبقوا ضيوفنا انتو الليلة
ترقدوا في الفريق حتي ان عشانا بليله
رد عليه ود دكين
مسكنا الدرب أسرع قوام ما تلعب
دارك ديمه عامره والسمح ما بكعب
يكفينا الوصف لاتشد جمل لا تتعب
وهدنا الطريق عقب الوصول ما بصعب
رد عليه طه
يمين تغشوا الفريق بتفوتوا نحنا مقابر
رد عليه شيخ العرب
عامر انشاء الله ديمه اياك مرسى العابر
مشطوطين خلاص مسكنا في دريب جابر
نخاف عوج الطريق منو لي المقدر خابر
رد عليه طه
دريب جابر مزم والسكه سالكه ورايقه
فرقان ما بتلاقيك ما بتعوقك عايقه
اخذ خاترنا نحنا قالوا واصله السايقه
بتراوح ام شديده باكر زواملك فايقه

رد عليه ود دكين
الزول ان وعد شين ميعادو يخلفو
في ربط اللسان يسخابو دمو يتلفو
سفري الليله فيه زولين ما بختلفو
ضروري اصل ام شديده علي وعد بي حلفو
ما بعرف ازوق من نشيت تبيت
فريقكم لي فريق وبيتكم يمين لي بيت
اجيك ديناً علي حتي إن بقيت حبيت
هاك وعداُ نجيض ارجانا بكره مبيت
شوفتي للفريق ايام بكي ابواتك
مو غابيني حالو وسمعت بي نخواتك
فريقك بكره ضيفوا وما بفوتوا وحاتك
إلا أحققك وبراي اشوف نفحاتك
يا ود الهميم النفسوا ما معارضاه
كرم الضيف عليك مكانه ابوك فارضاه
جاييك في امر ان تابه وان ترضاه
غيرك ما بكوس واملي بس تقضاه
رد عليه طه
غرضك مقضي كان احتاج لخيل وجمال
والضان والابل سارح يمين وشمال
ردعليه ود دكين
فوق القولتو انا لي فيك آمال
رد عليه طه
بي دمي الغرض اقضاهو خلي المال
المهم طه زي فهم شيخ العرب وده ماشيلوا جاي وطه ماشيلوا علي المال
فرد عليه شيخ العرب
دي المأموله فيك وين الدرب خترنا
رد عليه طه
دربكم في السلم
قالوا شيخ العرب
والله تب ما ودرنا
بكره نجيك ان قلينا ولا كترنا
وهنا ودعهم شيخ العرب وسار بي جماعته قاصد ام شديده وعلي اساس في اليوم التاني ينزل ضيف علي طه وقبيلة البطاحين
الرجوع الى أعلى الصفحة اذهب الى الأسفل
ابو تراجى
قلم ذهبي
قلم ذهبي


عدد الرسائل : 903
مزاجك اليوم :
تاريخ التسجيل : 11/03/2008

مُساهمةموضوع: رد: قصة ريا وطه   الأحد 04 مايو 2008, 3:38 pm

الابيات الرائعة دى من تاليف الشاعر العملاق
ابراهيم العبادى وبالمناسبة من اجل هذه الملحمه كرمته جامعة الخرطوم بمنحه الدكتوراه الفخريه
ونتمى المواصله يا حافظ يا عبيد
ابو تراجى
الرجوع الى أعلى الصفحة اذهب الى الأسفل
الطيب بخيت
قلم فضي
قلم فضي


عدد الرسائل : 327
تاريخ التسجيل : 03/11/2007

مُساهمةموضوع: رد: قصة ريا وطه   الإثنين 05 مايو 2008, 1:28 am

أخونا الغالي/ حافظ ود العبيد

لك أعظم التحايا ونشكرك على عرضك الرائع لروائع أدبنا الشعبي

ملحمة (طه وريا) التي تعتبر من أجمل روائع الأدب الشعبي

والتي قدمت سرداً جميلاً للحياة العامة في بلدنا الحبيبة

وعكست التواصل والترابط السوداني الأصيل

فلك منا الشكر والتقدير على هذا المجهود الذي أتحفتنا به















الرجوع الى أعلى الصفحة اذهب الى الأسفل
حافظ العبيد الطاهر
قلم ذهبي
قلم ذهبي


عدد الرسائل : 513
تاريخ التسجيل : 28/10/2007

مُساهمةموضوع: رد: قصة ريا وطه   الإثنين 05 مايو 2008, 2:01 am

اخونا الطيب بخيت


ادام الله عزك وفتح لك خيره ومتعك بالصحة والعافية
شكرا اخى للمرور ، ونحن شعب غنى بارثه وتراثه
ولابد من نشر التراث .
ولعل القصة هذه هى اقرب القصص الى منطقتنا
وربما يكونون هم اهلنا يعنى هذه القصة هى فخر لنا
وانت تعم ان ديار اهلنا واخوالنا البطاحين تمتد من شرق
النيل مباشرة الى ابو زليق من بعدها ارض الشكرية
لك كل حبى وتقديرى
الرجوع الى أعلى الصفحة اذهب الى الأسفل
وليد عثمان علي سنقد
مشرف
مشرف


عدد الرسائل : 1546
العمر : 41
الاقامة : الجريف أرض الطيبة والطيبين
المهنة : موظف
مزاجك اليوم :
تاريخ التسجيل : 25/02/2008

مُساهمةموضوع: رد: قصة ريا وطه   الإثنين 05 مايو 2008, 2:30 am


يا حافظ تحياتي ..
والله الملحمة في قمة الروعة ..
وأنا من المعجبين خصوصاً بالملحمة دي يا حافظ ..

دحين يا ود عبيد ما تعزبنا وأسردا لينا كلها مرة واحدة
قبال السيوف تقطع رقابكم ..



ودمتم لنا ...
الرجوع الى أعلى الصفحة اذهب الى الأسفل
حاج احمد
عضو جديد
عضو جديد


عدد الرسائل : 24
تاريخ التسجيل : 09/03/2008

مُساهمةموضوع: رد: قصة ريا وطه   الأربعاء 07 مايو 2008, 12:45 am


اخونا حافظ
عمت صباحا
عطرتنا بطه ورياء وما اديتنا الباقي
نحن منتظرين الجديد يا مبدع

حاج احمد
الرجوع الى أعلى الصفحة اذهب الى الأسفل
 
قصة ريا وطه
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
............ :: المنتديات الرئيسية :: الجريف العـــــــام-
انتقل الى: