الذين والزاى

موضوع: الذين والزاى الثلاثاء 27 يناير 2009, 5:49 am

احباب المنتدى
لاحظت في بعض مشاركات الاعضاء انهم يعانون من هذين الحرفين "الذين والزاى"
مثلا كلمة ذلك تكتب عند البعض زلك ..
وكلمة هذا تكتب هزا
وكلمة الذي تكتب الزي
اذن تكمن المشكلة في التفرقة بين حرف الذين والزاى وانا واحد من الناس اللّسه ما عارف الفرق بينهم شنو؟!! وقد راسلت استاذي الخضر بهذا الخصوص ولم ينجح في اقناعي!! وحالياً اعتمد على شكل الكلمة مثلا هزا بشوف بالممارسة "ساكت" انها ما جاية ومفروض تكون بالتانية !!
اتمنى ان نجد حل لهذه المشكلة البسيطة الغربية العجيبة !!
تحياتي ،،، وحبي ،،، واحترامي ،،،

يا نقطة عسل
بتعرف ابو الحروف الاقوى من الشدة والكلام داك بتاع المسلسل .والله ضحكتنى عشان اخوك اتجلد فى الكلام دا جلد شديد وبرضو ما بعرف افرق بين الاتنين
العناد بقى حاله نفسيه بى سبب الجلد بعاكس نفسي في الموضوع دا الى الان

الحبايب عبدالله وأيمن .. اللخبته دي لاعرفناها لجنه ولاعرفناها وجنه .
ولاجاية حنكشة ولا معروف ليها أصل أساساً .

الزين ياجماعه ( ز ) وبيقولو عليها أخت الراء ( ر )
والتانية ياعبدالله اسمها الذال ( ذ) ودي أخت الدال ( د) بدون النقطة
الزين الأولى في نطقها لاتخرج لســانك لكن الذال يخرج فيها لسـانك
حاول انظق الاتنين وشوف الفرق ... قول زين وقول ذال
الحاجه التانية : عندي نكته بالمناسبة دي
في طالب في المدرسة الاستاذه قعدت تشرح ليهم الفرق بينهم
وقالت ليهو طلع لسانك وقول ذاااااال فطلع لسانه وقالها وفضـل على حاله
وبعد مسافة طويلة قالت ليهو مالك مطلع لسـانك قال ليها انتي قلتي لي طلعو قبيل
وماقلتي لي رجعو تاني .. علشان كده خليتو بره ... عليك الله شوف الحالة دي ..
هههههههههههههههه . أنا كده ممكن أكون حليت مشكلة نطقهن والفرق بيناتهن .
لكن تبقى المشكلة مشكلة كتابتهم والتفريق بيناتهم في الكلمات يعني بكره ممكن واحد يجي
يكتب ( الزي ) وبرضو ومايطلع فيها لسانه ويجي واحد يكتب ( ذبيب ) والصحيح زبيب ويقوم يطلع فيها لسانه .. والله دي تكون مشكلة ..
أنا عارف أنو الواحد ممكن يعرف الفرق بيناتهم سريع ويفهمه لكن المشكلة يتذكرو كيييييييف ؟
دي القضية هنــا تكمن ..

تفحيطه كده على السريع :
عبدالله العنوان انت كاتبو غلط وملخبط بيناتهن برضو ... اسمها الزين والذال

والله النصيحة يا ايمن اته قاعد تشترها شديد وخاصة انك قاعد تكبر الخط شديد
يعني كلمة هذا اته قاعد تكتبه كدي هزا..والعجب الذي عندك الزي ولما الخط يكون كبير بتكون ظاهرة انها ما من هنا !
السؤال .. ما هو الحل ؟!! بس ما تقول لي دي بطلعو فيها اللسان وما ادارك انا دائر اكتبها ولا اضوقها!! ؟!!

الهندي بشير نابري كتب:: الزين ياجماعه ( ز ) وبيقولو عليها أخت الراء ( ر )
والتانية ياعبدالله اسمها الذال ( ذ) ودي أخت الدال ( د) بدون النقطة

انا بتذكر زمان انو ( ز ) معناها زاآآ زيل "حق الحصان" ..( ذ ) .. شنو ما متذكر والله
لكن البعرفو انو حقت الزيل دي بطلعو فيها اللسان
والبتشبه الدال دي ما بطلعو فيها اللسان
بس الواحد كان اتغاتت وما طلع لسانو حايكتبها كيف ؟!!

هههههههههههههههههههه
عبدالله .. عساها ضاحكة سنينك
لما تجي تكتبها ياسيدي ضوقهـا بالأول وتاني اكتبها
الى ان تتعود عليها وبعد كده قولها واكتبها ساي من غير
ضواقـة

الهندي بشير نابري كتب:: تفحيطه كده على السريع :
عبدالله العنوان انت كاتبو غلط وملخبط بيناتهن برضو ... اسمها الزين والذال

والله يا هندي حالتي عملت حسابي شديد !!

بسم الله الرحـمن الرحـيم
حقيقة الموضوع مهم لأن اللغـة العربية هى لغتنا الأم ومن يجهـل أمـه يكون على أحسن الفروض يتـيم ومن يتجاهلها كسلاً أو عـمـداً يدخـل فى دائـرة العـقـوق . والتعـبير اللغوى يكون1/ بالنـطـق : وهنا العلاج يـكـون بالإهتـمام بـمخـارج الحـروف ويمكن التدريب على ذلك بـدراسة علم النحـو وأيضا عـن طريـق التجـويد للقرآن الكـريم. و سرعـة إجادة النطق تتوقـف على درجة قـرب أو إبتعاد اللهجة المحـلية للفرد عـن اللغة العربية.
2/ الكتـابة هنا الأمر أكثر صعـوبة واسهل علاجاً الصعـوبة تكـمن فى أن الخطأ المـكتوب أكثر وضـوحـاً ولمعـاناً من شارة المرور الحمـراء وسوف تظل تلمع طيلـة العمـر مالم يرجـع الكاتب إلى الخـلف ليصحح الخـطأ واكثر فئة تعانى هى فئة المؤلفيـن حيث أن الأخطاء المطبعيـة تؤرق مضجعـهم لأن سقوط كلمة أو تبـديـل حرف أو قلبـه قـد يغـير المعنى.
العـلاج سهـل حيث يمكن لمن يعانى من عـدم التفرقة بين حرفين متشابهين فى النطق ظاهرياً ومختلفين فى الرسم الكتابى ,على المرء هنا أن يعمـل قائمتين قائمـة لكل حرف وكلمات مركـبـة منه ويبحث فى الكتب السليمة اللغـة ويدون عـدة كلمات ويتخذها مرجع كلما أراد أن يكتب وبعد فترة قليلة يـجـد أن مشكلته قـد أختفت. وعمل قوائم للكلمات سهل جـدا لأن اللغـة العربية لغة اشتقاق { الإشتقاق هـوصـنـع عـدة كلمات من جـذر الكـلمة وتـحـمل هـذه الكلمات معنى مشترك } مثلاً زائر .. زوار.. زيارة .. مزار //ذكرى.. ذكريات.. تذكارى.. // زكي.. زكاة.. تزكية.
والمشكلة أن كتابة الحرف الخطأ يغير كل المعنى مثلا:ـ الزين تعنى الشئ الجيد أو المستحسن
والذين هى اسم موصول لجمع المذكـر ومفرده الذي.
وختاما الكتابة الصحيحة واجب أكثر مـن وسام.
استراحـة:ـ * بعض المسافرين مروا فى طريقهم بجمع من الناس يجهـزون قـبراً ويخلطون التراب باللبن ليـصـنعـوا الطوب حيث أن شيخـهم قـرأ كلمة لبْنة وجمعها لبن والتى تعنى هنا ما يبنى به حيث انه افتكرها تعنى اللبن والفرق فى الكلمتين ناشئ من التشكيل.
** احـد التلاميذ قال له المعلم يجب إخراج اللسان عنـد نطق حرف الذال فنطقها ولكن المعلم لاحظ بعتد فترة أن التلميذ ترك لسانه خارجاً فسأله لماذا لا تـدخل لسانك؟؟ فقـال التلميـذ ولكنك أمرتنى بإخراجه .
*** واحـد أخـونا لـه مشكلة مستـديمة مع حرف الـثاء وفى كلمة المـبـثوث {كالفراش المبثوث}
يقـول الـمب...ثم يخـرج لسانه ويدخـله ويتمهـا سوووووووووس.. ثم يخرج لسانه فى نهاية الكلمة.
ورغـم كل هـذا أعترف بأنى أحيانا لا اكتشف بعـض الأخطاء إلا بعد أن أعيد قرأة الموضوع عـدة مرات.. وكل من يعـانى من مشكلة الذال والزين عليـه الإستـعـانة بالأخ محمـد زين نابرى لأنه متخصص فى التـفــرقة بينهـمـا بحـكـم شهـادة الميلاد ويـا محـمد زين تـلحقـنـا وبالعـديـل والزين تبسطنـا
خضر حـسن

الخضر عسل الفضل ..
انا مقتنع بالكلام ده
بس الطريقة التقنع

ده شنو!!
الزول ده سائق سواقتو ساكت!!!

يـا أستاذ انتم ناس كلكم ذوق ومذهلين ومن زمان تستحقوا يضبحوا ليكم زرافة لأنه لحمها لذيذ ومـمتـاز كما يقول زوار زائير واللى ما مصدقنى يسأل الزينكوف أو ناس زكى وزكية وكذلك الزين وعزيزة أو يذهب يأكل الزلابية عند زبيدة و يسمع أغانى الإذاعة ويهديها إلى زينب والزين والزملاء بالبرازيل والأهل بود الزاكى والخطيبة زينة الزمان بالزريبة... يا اخوانا يلزمنا زول يكـمل هذه النزهـة .
خضر حسن

عبدالله محمد نابري كتب:: .
انا مقتنع بالكلام ده
بس الطريقة التقنع ده شنو!!
الزول ده سائق سواقتو ساكت!!!

يـا أخـوى الـزول دا عـارف انه العربيــة دى حقت أهـله لكـن سائـق
بمـزاج عشان هـو متأكـد انه لا يـوجـد بـوليس حـركة وسكـون فى
شوارع النـت.
خـضر حـسن[/size

تحياتي للجميع الذين يشاركون في هذا البوست الذي فتح لنا نوافذ ذات معان سامية ونشكر أستاذ الخضر على هذه المحاضرة الراقية السريعة ولا عجب في ذلك فبيت الهزبجر لا يخلو من العظم كونك أستاذاً ومعلم أجيال.

أظن أن الأخ العزيز عبدالله فتح على نفسه نافذة من القذائف ولكن صدقنى لا هزيمة تتجرعها بل تسمو بك هذه النافذة في فضاء هذا المنتدى.والأخ الهندي ما قصر في شرح الزين والذال فقط عليك التدريب يا عبدالله.

الحبيب حســن تحيـاتي السامقات ..
أنا لم آتي إلا بشرح ركيك ... حتى أتى الدرس من الاستاذ الخضـــر حسن
وتعلمنـا جميعــا لكن أخونـا عبدالله البقدروا على التمرين شنو .. اسه يقول
ليك ذمان وزلك