العيد مالو

موضوع: العيد مالو الأحد 05 أكتوبر 2008, 12:00 am

أخوتي من العايدين ان شاء الله

يا أخوانا عندي سؤال محيرني عن السيد العيـــد السعيـــد

هل العيد ده ماشي علي أبيخ ولا نحنا الماشين علي أكــبر

بمعني هل اطفالنا الصغار بيســـتمتعوا بالعـــيد بنفس كميه

الاستمتاع بتاعتنا لمن كنا صــــغار ولا الحاصل شـــــنو

انا بتخايل لي انو كلما الزول بكبر بتغير جواهو شكل العيد

السنه الاولى العيد لقاهو عزابي السنه التانيه لقاهو متزوج

السنه الاولى لقاهو جوه البلد السنه التانيه لقاهو بره البـــلد

السنه الاولى لقاهو وكده ولا شنو الحاصل بالظبط ياجماعه

موضوع: رد: العيد مالو الأحد 05 أكتوبر 2008, 4:02 am

أخونا عمر ..
كل سنة وأنت طيب ..
يا باشا .. العيد ياهو العيد ..
بس بتختلف بعض المعايير ..
ونظرتنا للعيد وفهمنا ليه .. بختلف من عمر لي عمر ..
وزي ما كانت نظرتنا للعيد زمان ونحن صغار .. برضو نظرة أطفالنا ليه أسه واحد ..
بس بتختلف طريقة الأحتفاء به من عهد إلى عهد .. ودي سنة الحياة ..
زمااااان كنا بنلعب مجاني .. أسه اللعب بالقروش ..
زماااان بنلعب شليل وين راح وكمبليتة وغيره من اللعب المتاح والمجاني ..
اسه الأطفال بحبوا يلعبوا المرجيحة بالقروش ويمشوا المنتزهات بالقروش .. ويركبوا عربات الأجرة بالقروش .. .. لكن بلقوا نفسهم فيها ..
زمااااااااان بتلقى حاجة فلانة وحاج فلان بعملوا لينا الحشوات مجااااااااني وبدون أي دمغات ..
اسه لازم تدفع وتدفع عشان تأكل .. واصبح الأطفال بشتروا الشاندوتشات وليس الحشوات ..

وكل سنة وانت طيب ..

ودم لنا ولها ...

شاكر لمرورك يا غالي وبكرر وذي ما قلت انت بالجد
مفروض تتوج بلقب المشرف المثالي وقريب ان شاء الله
حتلقانا معاك في دارك العامره

ابو يارا

اخونا عامر واخونا ودسنقد كل عام وانتم بخير وعلى اتم صحة وعافية وبى لغة ودسنقد حبابكم فد الف اقبل العيد ونحن زى مانحن والله ياود سنقد حظك معيد مع الاهل وبتضوق كعك العيد بس ماتكتر فيه بجيك احم احم ونحنا خليها على الله عيدنا صلاة فقط تصلى ولا تعرف اليمينك من يسارك وبعد الصلاة تروح على الدوام لافى كعك ولافى ناس فلان ولا تلف على الحبايب يالله زكرتنا ياخ عامر اللحظات الحلوه وكنا ننتظر الصباح بفارق الصبر كى تمزح مع الاصدقاء وتدس طاقية ده وتدفر الثانى فى كلب فلانة والله ايام واتمنا من المولى ان يجمعنا وياكم وكل عام وجميع اهلى الجرافة الحنان بالف الف مليون خير وعافية music

العزيز عامر
العيد مبارك عليكم... علينا و عليكم ... العفـــو لله و الرسول وكل عام و أنت وجميع أفراد أسرتكم
الفاضلة بخير
بعد أن قرأت كلماتك عن العيد ذهبت بي الذاكرة مستحضراً أخي العزيز عادل (رحمة الله رحمة واسعة وأسكنة
الفردوس) سألت نفسي كيف كان سيكون تعليقة عن "العيد مالو"!! على كل حال كان تعليقه سينال إعجابك رغم أن
مايريد أن يعكسه كعادته لا يكون واضحاً سهلاً بل تجده داخل الحروف.
أعود لما كتبت مبتدئاً بهذا السؤال ماذا ينتظر الطفل من العيد؟ و أعتقد الإجابة تكمن في ما يأتي به العيد
بالنسبة له. أي بأن في العيد تتحقق له أموراً يصعب تحقيقها في الأيام الأخرى، الملابس
الجديدة، الهدايا المادية و العينية، اللعب و فوق ذلك العناية الخاصة التي يجدها
من والديه و بقية الأهل عندما يطوف عليهم. إذا لم يتحقق له ذلك تكون فرحته ناقصة.
ماذا ينتظر الكبار من العيد؟ أعتقد إذا تحقق ما ينتظرون تكون الفرحة....

عامر عبد الوهاب كتب:: شاكر لمرورك يا غالي وبكرر وذي ما قلت انت بالجد
مفروض تتوج بلقب المشرف المثالي وقريب ان شاء الله
حتلقانا معاك في دارك العامره

ابو يارا

ياخ تشكر على الزوق يا زوق ..
وتشرفنا في اي وقت يا عامر ..
والدار اكيد حا ترحب بيك وبقدومك يا مك ..
وياريت لو جيت ومعاك كل الأعضاء المتواجدين في السودان ..
وكل عامر والعيد بخير ..

ودم لنا ...

عامر عبد الوهاب كتب:: يا أخوانا عندي سؤال محيرني عن السيد العيـــد السعيـــد هل العيد ده ماشي علي أبيخ ولا نحنا الماشين علي أكــبر

عامر عبد الوهاب .. العيد مالو !!
العيد ما ماشي على ابيخ ولا نحن ماشين على اكبر..
العيد بطَلع العقارب بس! تاني ما بعمل اي حاجة !!

موضوع: رد: العيد مالو الخميس 16 أكتوبر 2008, 6:51 am

ياتو عقارب يا ود نابري
الهبشك ما ضراك