............

حبابك عشره يا زائر
 
الرئيسيةالتسجيلدخول

شاطر | 
 

 قنصلية الجريف

استعرض الموضوع السابق استعرض الموضوع التالي اذهب الى الأسفل 
انتقل الى الصفحة : الصفحة السابقة  1, 2, 3, 4, 5, 6, 7  الصفحة التالية
كاتب الموضوعرسالة
معز
قلم فضي
قلم فضي


عدد الرسائل : 330
الاقامة : السعودية/القصيم
تاريخ التسجيل : 09/01/2008

مُساهمةموضوع: رد: قنصلية الجريف   الأربعاء 12 نوفمبر 2008, 4:00 am

كتب ابو تراجي
فقط علينا الكشوفات واستلام الاموات اسف اقصد الاموال
وعليكم الباقى (تحج ماتحج ماعندنا معاك شغلة )

بس دايرين حقنا !!!!

*********
الحمد لله اهو النصب ظهر عند القنصل العام للجريف شرق حتى فى الحج
اذا هذه ستفيدنا كثيرا فى المحكمة وهى اعتراف بخط يده(ابو تراجي) حتى يتم استعادة الحقوق كاملة غير منقوصة ( طواقى اعضاء المنتدي )

معز ود عبد المنعم
رئيس مجلس ادارة جمعيات طق للمشاكل والاستهداف (لناس معينين ) sad
الرجوع الى أعلى الصفحة اذهب الى الأسفل
http://aljraif.forumotion.com
عصام عبدالصادق
قلم فضي
قلم فضي


عدد الرسائل : 429
تاريخ التسجيل : 23/09/2007

مُساهمةموضوع: رد: قنصلية الجريف   الجمعة 14 نوفمبر 2008, 4:35 am



الجزء الثالث من المحاكمة ( قضية الطاقية )

إنتهت الجلسة السابقة بطرد المدعو تسالية والذي أخذ خارجاً بواسطة أمن القاعة .. وحتى الأن جهته غير معروفة..
وفيها القاضي رفع الجلسة وطلب حضور كل الذين وردت أسماؤهم الهندي – بدر – حسن – منير – ود سنقد الطيبودريا – الأستاذ خضر – عبدالله نابري – بديع كندا كل الشهود حضروا ما عدا بديع الغريب ,ارسل مذكرة إعتذار لعدم تمكنه ولتواجده خارجياً في بلاداً بعيدة.. وأستاذ خضر .. أعتذر لأسباب غير معروفة .. ولكن العالمين ببواطن الأمور إعتبروا أن عدم حضوره بسبب القرصة التي تمت على إشتراكه ومفاتيحه العامة والسرية .. لذا متوقع أن تحدث له قرصنة مباشرة في حالة حضوره .. وعلمنا أن حاج على إلتزم بحمايته حتى إنتهاء الجلسات .. ولكن الأستاذ مصر على رأيه .. والمحكمة تفهمت هذه المبررات .. لدواعي أمنية أيضاً ..

تغيير القاضي فتحو حاج يونس ترك علامة إستفهام .. وخصوصاً بعد مذكرة إعتراض المستشار الفني حاج على .. وعليه تم تعيين قاضي آخر غير معروف لدواعي أمنية
بدأت الجلسة بعد أن تم الإعلان بواسطة الحاجب
القاضي يتأكد من تواجد الجميع .. بعدها يطلب من الهندي بشير الحضور أمامه فيتحرك الهندي في خطوات متثاقلة ووجهه بادى عليه الإرتباك ...
القاضي عرف بنفسك وأحلف القسم
الهندي يعرف بنفسه ويحلف القسم
القاضي : يا هندي بتعرف عصام وأبو تراجي
الهندي : يهز برأسه لا لا
القاضي : متعجباً ما بتعرفهم أبداً
الهندي لا لا يا مولانا نعم بعرفهم جيداً.
القاضي : طيب كيف تقول ما بتعرفهم
الهندي : يا مولانا والله أنا مرتبك شوية .. ودي أول مرة أدخل قاعة محكمة ..
القاضي: عندما شعر بإرتباك الهندي حاول تهدئته قليلاً .. وقال له معليش خليك طبيعي .. وبعدين دي فرصة ونترحم على روح فقيدكم وفقيد المنطقة الحاج سليمان هاشم وأحسن الله عزاؤكم.. ونسأل لله المغفرة الرحمة من الله ..
هنا إرتاحت سريرة الهندي .. وهذه الكلمات كانت عليه ذات تأثير كبير.
هنا يستأذن ممثل النيابه من القاضي ويطرح بعض الأسئلة على الهندي وبإبتسامة خفية قال للهندي أنا لاحظت عند ما سألك القاضي قبل شوية وجدتك تجاوب بتحريك رأسك .. وهل لإسمك ( الهندي ) علاقة بذلك ربما تكون متأسر بالجالية الهندية أو أفلامهم.
وهنا وسط القاعة يقف أحد الحاضرين ويقول للقاضي .. لا ... لا يا مولانا إسمه ليس له علاقة وده سماهو جدو على / الشريف الصديق الهندي .. لكن عشان الصورة تكون واضحة ليك أصلوا الهندي ود خالي ده أكمل دراسته في الهند.. عشان كدة متأثر شوية .. لكن شوية شوية حا يكون طبيعي زينا كدة.
القاضي : يطلب من المتداخل وبلهجة قوية .. من الذي إذن لك بالتوضيح .. وإنت فاكر نفسك وين .. شوف والله لو تدخلت بكلمة واحدة تاني .. إنت عارف كويس شنو البيحصل .. أجلس !! وكانت لهجة حادة جداً من القاضي .. وطبعاً الراجل طلع الطيب بخيت.
ممثل النيابة: شوف يا هندي الأوراق التي أمام القاضي فيها دليل بأنك أول متداخل في بوست القنصلية ونصه كالتالي:
ههههههههههههههههههههههههه
الرائع أبو تراجي ... تحياتي
أنا اثني وابصم بالعشرة على الاقتراح
قنصلية الجريف شرق بجده وجده غير
وأبو تراجي غير وغير وغير
ممثل النيابة: هل هذا حديثك؟
الهندي: نعم إنها كلماتي:
القاضي : طيب ماذا تعني ضحكتك في المقدمة
الهندي: لا يا مولانا أنا ما كنت بضحك .. دي كانت قحة ساي .. يعني عشراقة
ممثل النيابة: يضحك .. والله جميل جداً أنك بتعرف العشراقة .. في زماننا هذا
الهندي : كيف يا مولانا .. والله نحن ما ممكن نتنازل عن أصالتنا وموروثاتنا سوف نعض عليها بالنواجذ ..
وفي هذه اللحظة يلتفت أبو تراجي لمن هو خلفه ويقول له والله لو سألوا عصام ده قالوا ليهوا نواجز دي شنو ما يعرفها .. ولسوء حظه لم يتبين أبو تراجي من هو خلفه .. وطلع ود سنقد وباقت أبوتراجي مباشرة وقال له ها اللتخة ده أحترم نفسك وعاين قدامك .. وبعدين أتعلموا مخارج الحروف كويس وأتكلم وأسعدي في زمتك الهندي ده قال نواجذ والا نواجز .. وفي هذه اللحظة تدخل معز عبدالمنعم والذ يجلس بجانبه وقال له .. سيبو .. سيبو .. ده دنقلاوي .. وفي هذه اللحظة أبو تراجي كان حا يتهور ولكن ربنا ستر ومعز السماني أمسكه من يده لتهدئته.. طبعاً كل هذا المشهد بعيد عن أعين القاضي والمشغول بأقوال الهندي.
ممثل النيابة: طيب يا هندي ماذا تعني بأنك تبصم بالعشرة على الإقتراح
الهندي: يا مولانا والله أنا أعجبت بالفكرة وخصوصاً مضمونها يساعد على لم الشمل وستكون خـير مثـال للتعـاون فـي الـبـر بين أبناء المنطقة الواحدة.
ممثل النيابة: طيب ما إشتميت أي ريحة في دعوة أبو تراجي.
الهندي: والله أنا قلبي أكلني عندما حدد عمنا حاج علي وعمنا عصام بأنهم سوف يكونوا معه في إدارة هذه القنصلية... لكن برضو في نفس الوقت كانوا مصدر ثقة لمعرفتي بهم قبل أبو تراجي ..
ممثل النيابة : طيب يا هندي أبو تراجي ده في دعوته كان يتمنى حضور بدر عبدالماجد عشان ينفضو .. هذه النقطة الم تتوقف فيها قليلاً.
الهندي : والله أنا إعتبرتو بيمزح ساكت .. وخصوصاً هو معروف بالكلام الزي ده .. وبعدين الجماعة ديل معاهو يعني ما منو خوف ..
ممثل النيابة: يا هندي الطاقية محل الدعوى .. هل لديك أي خلفية عنها
الهندي: نعم وآخر مرة شاهدتها قبل إختفاؤها بأسبوع وكان يعتمرها عصام في فطور الجمعية خلال شهر رمضان هذا العام 1429هـ وتم توثيقها في عدة لقطات بالصورة.
القاضي : طيب يا هندي عندك أي إضافات أخرى
الهندي : لا والله بس يا مولانا عاوزنكم تحكموا لنا بالعدل ونحن عاوزين القضية دي تنتهي وتظهر الحقيقة حتى نقفل هذا الباب.
القاضي: يستدعي وليد (ود سنقد )
يحضر ود سنقد ويعرف بنفسه ويحلف القسم:
القاضي : ماذا تعرف عن الطاقية والقنصلية وبإختصار شديد
ود سنقد: كدي أول حاجة يا باش..
القاضي: أحترم نفسك .. ومافي داعي لكلمة يا باش .. والباشوية دي ماعندنا هنا وحتى في بلادها زمنها خلاص إنتهى.
ود سنقد : حاضر يا باشا .. شوف يا مولانا والله بالنسبة للقنصلية من أول يوم في البوست أنا كلامي كان واضح وما فيهو أي لف ولا دوران وبتذكر أنا عملت المداخلة دي :
هوي أعملوا حسابكم ..
أبو تراجي دا عامل ليكم كمين ..
والكلام ليك يا المنطط عينيك ..
اللهم قد بلغت فأشهد ..
يستأذن ممثل النيابة من القاضي ويوجه بعض الإسئلة لود سنقد
ممثل النيابة: يا ود سنقد من كنت تقصد ( يالمنطط عينيك )
ود سنقد : والله دي أنا بحتفظ بيها لي نفسي.. ودي حاجة خاصة وإذا إتكلمت فيها الدنيا حا تتخرب وتطربق في دماغي.
ممثل النيابة : طيب .. طيب عاوزين توضح لينا على أي أساس حذرت الناس من هذه القنصلية
ود سنقد: أصلو يا مولانا بعيد عنك أبو تراجي ده بتاع مشاكل .. ومحل ما يمشي وراهو مصيبة ..
هنا تضج القاعة ببعض الإحتجاجات .. ويقف الشفيع ويوجه كلامه للقاضي .. يا مولانا كلام الراجل ده ما يمر كدة ساي .. وده أسلوب بتاع لولوه .. وحرم أبو تراجي ده الغنماية تأكل عشاهو .. هنا يلتفت إليه بدر عبدالماجد ويقهقه بصوت عالي .. دهم نو ؟ أبو تراجي !!.. لا حول الله .. وهنا يهمز عبدالله ودنابري تحت تحت ويقول .. يا جماعة الشفيع السلس ده مو نصيح .. والله دي بالغ فيها عديل كدة ..
هنا يحاول القاضي بتهدئة الموقف .. ويطلب من الجميع الجلوس .. ويطلب من ود سنقد الحديث بتأدب وأن لا يخرج عن نطاق الموضوع .. ويمتثل ود سنقد ويواصل حديثه.
ود سنقد : بعدين يا جماعة الراجل ده دعوته كانت واضحة وصريحة للنهب وأرجعوا لكلامه وكل الإدلة ضده .. يعني يا باشا صاحبنا رايح فيها رايح فيها .. وبالنسبة للطاقية حرم شائلة عندو .. ويا مولانا أسألوهوا كمان عن قميص الرصاص بتاعي .. يا مولانا والله البلاوي كثيرة خلاص .. بس ربنا المستعان .. وكدي خلوهوا ينتهي من القضية دي .. وحرم قمصاني ما بخليها ليهو .. وهنا يحاول ممثل النيابة تهدئة ود سنقد قليلاً .. ويسأله عن موضوع قميص الرصاص ده ويقول له ياخي ما تكلمنا عنه شوية ..
ود سنقد: يا باشا ده موضوع طويل وحسب ما عرفت أن بوست إشاعة ملفه موجود هنا وفيهو كل الملابسات .. وكان ما مصدقني أسال الوجيه عبدالله ود نابري.
ممثل النيابة : وين عبدالله ود نابري ده
ود سنقد: عاين ليهو قاعد هناك ومنطط عينيهو
وهنا يطلب ممثل النيابة حضور عبدالله ود نابري... ويتقدم عبدالله بخطوات سريعة وكأنه كان منتظر دوره.
وفي هذه اللحظة يرفع القاضي الجلسة وتم تحديد يوم ../../2008م للجلسة القادمة وسماع إفادات عبدالله ود أمحمد نابري
الرجوع الى أعلى الصفحة اذهب الى الأسفل
حاج علي المنشاري
عضو جديد
عضو جديد


عدد الرسائل : 9
تاريخ التسجيل : 02/11/2008

مُساهمةموضوع: رد: قنصلية الجريف   الجمعة 14 نوفمبر 2008, 9:18 am

يا سلام يا عصام ... حقيقة أنا مندهش لما يسطره قلمك .. لأنني أعلم بطبيعة عملك .. وفي ظل هذه الزحمة الشديدة أستقرب جداً أن تأتيك هذه الأفكار وتربطها مع بعضها البعض وفي تحليل دقيق جداً .. وهنا تتجلى قمة العطاء لديك .. وتعجبني مداخلات الأعضاء التي صنعتها داخل المحكمة وكل مداخلة لها عدة معاني .. مثال لذلك المداخلة التي صنعتها لأخونا الشفيع أتت في توقيت عجيب جداً .. وصدقنى ضحكت من أعماقي لأنني فعلاً تخيلت الشفيع قدامي وأنا أعرف طريقته .. فأتت المداخلة كأنها حقيقة واقعية.. أيضاً أعجبت .. عند توقفك عند ذكر الأساتذة عبدالمنعم حاج خالد والأستاذ خضر حسن .. وحقيقة شعرت بالرهبة في هذه المقاطع بالتحديد .. وهذه النقطة أعتبرها لفت إنتباه لهؤلاء الجيل من الشباب لمعرفة دور المعلم في حياتنا.
أيضاً ضحكت جداً عندما علق أيضاً أحد الأخوان عندما توقف القاضي عند إسم الأستاذ خضر .. فوجدت أحد الأخوان يقول (سنة يا الخدر ) والله دي أنا بضحك فيها يومين ... ومنها بدأت أبحث عن صاحب هذا التعليق في جميع البوستات فوجدته الإبن حسن ود حاج شمس الدين .. وتعجبت عندما وجدته يتبع أسلوب جميل جداً ومواضيع مهمة ولكن في واحد من البوستات قدرت أحدد لم أدخلته في المحاكمة وبهذه الطريقة .. فأعتقد أنك وفقت جداً في ذلك.
لك التحية أخي عصام وأتمنى أن تواصل في هذا الموضوع لأنني أشعر بأن هذا البوست سوف يكون مستودع لتوثيق أحداث كثيرة في هذا المنتديوأتمنى من الله أن يديم المحبة بين الجميع ويبعدنا من المحاكم.
الرجوع الى أعلى الصفحة اذهب الى الأسفل
الطيب الامام الطيب
قلم ذهبي
قلم ذهبي


عدد الرسائل : 1225
العمر : 43
الاقامة : السعودية
المهنة : محاسب
مزاجك اليوم :
تاريخ التسجيل : 27/07/2008

مُساهمةموضوع: رد: قنصلية الجريف   الجمعة 14 نوفمبر 2008, 10:00 am

لك الود الاخ عصام اجريت لنا محكمة مستوفية تماما دحين ياخوى انت كنت قاضى او محامى والله سردك لمواجهة اخوى الهندى ود بشير كتلتنى من الضحك وانت ماقاضى بس كمان عندك تصاور رباطاب ودمت لنا فى انتظار الجلسة القادمة
الرجوع الى أعلى الصفحة اذهب الى الأسفل
خضرحسن الفضل
عضو فعال
عضو فعال


عدد الرسائل : 141
تاريخ التسجيل : 03/11/2008

مُساهمةموضوع: رد: قنصلية الجريف   الجمعة 14 نوفمبر 2008, 12:16 pm

إستــــدعـاء الشـهـــود لمحـاكمـات مـن إخـرج عـصـام عـبدالصـــادق تـجعـل سخـانـة كـرسى عـبدو بـرداً وسلامـــاً ونـعيمـاً على الجـالسين عـليـه...
الهندي: لا يا مولانا أنا ما كنت بضحك .. دي كانت قحة ساي .. يعني عشراقة { والله مـبالغـة مـنك}
عـصـام عـارف نـفسيـات كـل مـن فى المنـتـدى ومـافى حـاجة بـتـفـوت علـيه لا فـكـرة شـاردة ولا غـزالــــة واردة والهــنــــدى ولـد حـــــنـيـن لو قـرصـته بـاعـوضـة فى أصــبـعـه يـمـد لهـا يـده كـلهـا ويـقـول ليهـا بـاكـرالمـساء جـيبى مـعاك أهـلك وجـيرانـك لأنى مـعـزوم فـطـــور عـريــس مـع نـبيـل... وسبـب إرتـباكـه إنـه بشـير أبـوه لابــد فى تـاكسى بـره ومغـطى وجـه زى الطـوارق لأنـه عـيـب كـبيـر فى حـق الأسرة... النـاس تـقول عـلينـا شنـوا؟؟؟؟؟ ولـدهـم دخـلوه المحـكــمـة!!! عـشان كـدى مـافى واحـد عـارف إلا الطـيب بخـيت.
وسمعـنا أنـه فى الجـلسة الجـاية جـايـبـيـن فيـهـا عـبـد الله ودأمـحـمـد ودا مـافى خـوف عـلـيه لأنـه نـاس هـب النـسيـم مستـعـدين يـشيـلوا المحـكـمة بى قـاضيهـا وكـراسيهـا ومـن فـيهـا...وأولاد حـاج الأمـين مـستـعـديــن يجـــيـبـوا كـل المـعـلومـات عـن الـقـاضى وهـل هـو معـرس سودانـيــة أم مـصـريــة رغـم إحــتـــيـاطــــات عـصـام الأمـنيـة.
ود سنـقــــد كـان يتـكـلـم بقــوة بـحـكم العـادة والـريـادة فـهـو رائـد ومـشرف فى زمـن العــولمـة ومتـعـود عــلى نـهـر وقـهـر المتـداخـليـن بـسؤ فى البـوستـات.
ودمتم لنـا
خـضر حـسن

[/size]
الرجوع الى أعلى الصفحة اذهب الى الأسفل
عبدالله محمد نابري
قلم ذهبي
قلم ذهبي


عدد الرسائل : 968
العمر : 107
الاقامة : kSA - RIYADH
المهنة : Chief Accounts
مزاجك اليوم :
تاريخ التسجيل : 04/06/2008

مُساهمةموضوع: رد: قنصلية الجريف   السبت 15 نوفمبر 2008, 4:51 am

عصام عبدالصادق كتب:

وهنا وسط القاعة يقف أحد الحاضرين ويقول للقاضي .. لا ... لا يا مولانا إسمه ليس له علاقة وده سماهو جدو على / الشريف الصديق الهندي .. لكن عشان الصورة تكون واضحة ليك أصلوا الهندي ود خالي ده أكمل دراسته في الهند.. عشان كدة متأثر شوية .. لكن شوية شوية حا يكون طبيعي زينا كدة.

المسيخ (اللذيذ) عصام عبد الصادق

ياخي فعلا انا متحيّر من اسلوبك في هذه القضية بصورة عامة والتي اصبحت رمزية ومعجب جدا بقراءتك للشخصيات وقد وفقت تماما في موضوع هزة الرأس بتاعت الهندي دي لانو فعلاً من ما جه من الهند والزول بهز في رأسو كدا وكدا وكمان كلام الطيب بخيت اعلاه اكيد كان حايكون كلامو اذا كانت المحكمة دي حقيقية ..وبالنسبة للناس المابعرفو الطيب بخيت فهو ود عمة الهندي ..
بالجد البوست ده عسل بس!!
الرجوع الى أعلى الصفحة اذهب الى الأسفل
http://www.basilholding.com
ابو تراجى
قلم ذهبي
قلم ذهبي


عدد الرسائل : 903
مزاجك اليوم :
تاريخ التسجيل : 11/03/2008

مُساهمةموضوع: رد: قنصلية الجريف   السبت 15 نوفمبر 2008, 3:48 pm

لسة فى حالة الاطلاع
الرجوع الى أعلى الصفحة اذهب الى الأسفل
حسن
قلم ذهبي
قلم ذهبي


عدد الرسائل : 803
الاقامة : الرياض- السعوديه بلد المصطفى
المهنة : كيميائي
تاريخ التسجيل : 23/11/2007

مُساهمةموضوع: رد: قنصلية الجريف   الإثنين 17 نوفمبر 2008, 11:09 am

والله ياعصام ابداع المحكمه دي مفروض تمثل على ارض المسرح لك التحيه وللكل الموجودين في قاعة المحكمه والمتهمين وتحيه خاصه جدا للاخ حاج علي المنشاري وهذا ملطفك وكرمك ياستاذ
الرجوع الى أعلى الصفحة اذهب الى الأسفل
عمر حسن حمزه
عضو فعال
عضو فعال


عدد الرسائل : 146
تاريخ التسجيل : 03/06/2008

مُساهمةموضوع: رد: قنصلية الجريف   الأربعاء 19 نوفمبر 2008, 3:25 am


إتصل بي الأخ حسن الصاوي الذي كان في زيارة مع أخيه عمر الصاوي الى قنصلية
الجري شرق بجدة. و بعد خروجه من القنصلية لم يجد نظارته، إتصل بالسيد/ القنصل
للسؤال عن النظارة فربما تكون بمبنى القنصلية. و أفادة القنصل بشكل مباشر،
نعم إنها موجودة و يمكنك الرجوع لأستلامها. لم يرجع حسن الصاوي في نفس اليوم
و إتصل بالسيد/ القنصل في وقت آخر كان في القنصل مشغولاً.
رغم حسن النية و التعامل الجيد من القنصل، إتهم حسن الصاوي بأنه يعتقد بأن نظارته
نالت إعجاب القنصل و حاول أن يحتفظ بها متعللاً بمشغولياته الكثيرة.
و بعد دراستي لكلمات حسن الصاوي أعتقد أنه إتصل بجمعية "طق" التي أوحت
له بأنه يتعرض لإحتيال. رغم أن الأخ/حسن الصاوي ، لم يذكر ذلك صراحة
و لكن كان يبدو عليه الإرتباك فشعرت أنه ربما يكون مهدداً من المنشاري أو
من جهات لها مآرب أخرى. ذلك بعد تداولت وسائل الإعلام محاكمة السيد/ القنصل
دون النظر للحصانة التي يتمتع و يقر بها معظم أهل الجريف بالمملكة.
إني أناشد الحادبين على مصلحة النظر الى الأمر بتروي و وضع مصلحة الجريف
قبل المصالح الشخصية. فبدلاً من تبديد الجهود في البحث عن الطاقية أو النظارة ،
يجب أن يكون الجهد و الفكر في الخدمات التي تقدمها القنصلية و كيفية الإرتقاء بها لتقديم
الأفضل هنا تكون المصلحة للجميع.

يحضرني هنا واقعة مشابهة. فعندما بدأت جمعية حسن الخاتمة بالجريف شرق في حماية
مقابر ناصر من المعتدين. و جهت تهمة لأحد أعضاء الجمعية بأنه سرق غنماية
وهو المناضل بدر الحاج أحمد. و تم حجزه في مخفر الشرطة، علماً بأن الحكم
صدر من القضاء الأهلي؟؟؟؟؟ بدأ البحث عن الغنماية يشغل الجميع للإفراج عن
الأخ/ بدر وهذا ما يصبو اليه المدعي !!!
و أفيدكم علماً بأن السيد/ القنصل ذهب بنفسة الى الأخ حسن و سلمه نظارته
و لكن مازال حسن الصاوي يواصل إدعائة بأن النظارة أستبدلت حيناً و حيناً آخر
بأنها تشوهت. ألا يستدعي هذا الإدعاء الفحص و التحري؟ عمر الصاوي ظل بعيداً
عن الأحداث و أوحاول الإتصال به لدحر إدعاء أخيه.


الرجوع الى أعلى الصفحة اذهب الى الأسفل
معز
قلم فضي
قلم فضي


عدد الرسائل : 330
الاقامة : السعودية/القصيم
تاريخ التسجيل : 09/01/2008

مُساهمةموضوع: رد: قنصلية الجريف   الأربعاء 19 نوفمبر 2008, 3:45 am

الاخوة المحترمين السلام عليكم


ظهر الحق وزهق الباطل ان الباطل كان زهوقا
كل يوم يظهر دليل جديد علي المدعي عليه ابو تراجى اولا طاقية عصام عبد الصادق والان نظارة حسن الصاوي وقد اختفى ايضا جوال انس عبد المنعم بالقنصلية ولم يتم الحصول عليه حتى الان ولو ما مصدقننا ارجو الاتصال على جوال انس وسوف يرد عليكم شخص من داخل القنصلية والرقم هو 0505344310
وكل هذه دلائل على اخونا ابو تراجي ونطلب من المحكمة اتخاذ اقصي العقوبات على ابو تراجى وهى اولا
1- ارسال طواقى جمعية العزابة فورا الي الرياض وعددها عشرين طاقية وليس هناك مانع من شرائها من باب شريف
2- شراء عدد عشرين نظارة من المغربي
3- اجراء عشرين اتصال من جوال ابو تراجي على الجميع بعيد الاضحى
4- ............................... دى خلوها بتمشى بالخاص للمدعى العام ابن عم اوكامبو عصام عبد الصادق

وجمعية طق بفروعها الاخري
1- جمعية طق الرئئيسية وقائدها الهمام عصام عبد الصادق
2- جمعية طق للشوفة الشرعية وقائدها الميداني عبد الله نابري
3- جمعية طق للقرجات وقائدها الشفيع الجزولي وهو منشق من ابو تراجي
4 جمعية طق الفرنسية وقائدها الخضر حسن الفضل ( الخدر)
5 جمعية طق للنظارات واعضائها عمر حسن و حسن الصاوي
تعلن وقوفها التام مع المحكمة ومع ارجاع الحق لاهله
وترجو من قنصل الجريف التقليل من الهبشات وخاصة ان موسم الحج على الابواب

معز عبد المنعم قائد قوات جمعيات طق ( عائد بقوة بعد ظهور دلائل جديدة )
الرجوع الى أعلى الصفحة اذهب الى الأسفل
http://aljraif.forumotion.com
عمر حسن حمزه
عضو فعال
عضو فعال


عدد الرسائل : 146
تاريخ التسجيل : 03/06/2008

مُساهمةموضوع: رد: قنصلية الجريف   الخميس 20 نوفمبر 2008, 4:21 am

السيد/ حسن الصاوي مازال يواصل إدعائه فقد أفاد بأنه أصبح يرى الصورة مشوهه
بمجرد لبسه النظارة كما أنه يرى صوراً لا تطابق الواقع،
فأصبح بذلك في وضع خلل نفسي... نرجو التحري ...
هل ياترى أن النظارة إستبدلت بنظارة ثلاثية الأبعاد كتلك التي يستخدمها طبيب الأسنان لمريضه
حتى يشغل فكره ليبعده عن الألم، , إذا كان ذلك صحيحاً هذا أيضاً لا يدين القنصل، إحتمال الخطأ
وارد ولكن السؤال هو سبب وجود هذه النظارة في القنصلية و لأي غرض تستعمل .
وهل هي مدسوسة من جمعية "طق" أو للمحكمة أساليب أخرى في التحري، خاصة و أن
مستشارها المنشاري
الرجوع الى أعلى الصفحة اذهب الى الأسفل
ابو تراجى
قلم ذهبي
قلم ذهبي


عدد الرسائل : 903
مزاجك اليوم :
تاريخ التسجيل : 11/03/2008

مُساهمةموضوع: رد: قنصلية الجريف   الخميس 20 نوفمبر 2008, 5:26 am

الى الذين اطالوا اصابع اتهامهم ضدى

لاحول ولا قوة الابالله العظيم
بس خيراً تعمل شراً تلقى
ياجماعة قولوا انا حرامى عديل كدة !!!
انا البمشى للناس ام هم البجو عندى !!!
الواحد يجى مقطوع ودايش مابعرف الشرق من الغرب
تمشى تجيبو تعمل معاهو الواجب وزيادة حبه
ولانو دايش يخلى نظارة على الكرسى الكان قاعد فيهو
ويتصل يقول ليك ما قادر ارجع ليك لانو ما بعرف طريق الرجعة
ويبقى النظارة زى مسمار جحا كل دقيقة يتصل عليك بدون زمن ولا ذوق
داير تمشى تجيبو ويخسرك (بنزين وغداء وشاى وقهوة) ونحن راضين
بعد ده يقول سرق طاقيتى ونطارتى وجوالى ......الخ
عموما نحن عارفين روحنا ومنتظرين الخونه ديل وناس طق وامثاله بعملو شنو
ولثقتنا فى المحكمة ساكتين ساى لانو الحق مابضيع ابداً
لكن بعد داك الجماعة ديل بعملو شنو ؟؟؟؟؟؟؟؟؟؟؟
والله النظارة بتاعت الاسمو حسن الصاوى ده لو الواحد لقاها فى الشارع
مابدنقر يشيلها بس وحاتكم اسم نظارة وشاحد الله مافى زول يشوفها لانو حيصاب
بشى من الاكتئاب النفسى منها !!!!
بعدين الزول كان مادايش يقلع النظارة من وشو ويخليها ويمشى ده معناهو انو زهجان منها
هذا اولاً وتانياً مستجد على الاستعمال (استعمال النظارة)
غايتو خسرت بنزين فى الفارغة والله عليمك الله لامن اتصل على وقال نسيت نظارتى قلت تكون مطلية بى موية دهب ومرصعه بالجواهر والماس
بس الحمد لله الماشافوها اغراب من خارج نطاق الجريف
اشكر السيد السفير عمر حسن حمزة على ثقته ودفاعة عن الحق
وناس طق ديل بس طاقية من باب شريف بى نصف ريال بتجيب راسهم
والله المستعان
المفترى عليه
ابو
تراجى
الرجوع الى أعلى الصفحة اذهب الى الأسفل
الطيب الامام الطيب
قلم ذهبي
قلم ذهبي


عدد الرسائل : 1225
العمر : 43
الاقامة : السعودية
المهنة : محاسب
مزاجك اليوم :
تاريخ التسجيل : 27/07/2008

مُساهمةموضوع: رد: قنصلية الجريف   الخميس 20 نوفمبر 2008, 8:24 am

اقتراح بعمل صندوق امانات يكون على بعد من يد القنصل ويكون مفتاح الصندوق مع الشخص ويضع اى شى يخصة ماعدا الملابس العلى جسدة ولكم الراى ولاشنوا ياودنابرى
الرجوع الى أعلى الصفحة اذهب الى الأسفل
ابو تراجى
قلم ذهبي
قلم ذهبي


عدد الرسائل : 903
مزاجك اليوم :
تاريخ التسجيل : 11/03/2008

مُساهمةموضوع: رد: قنصلية الجريف   الخميس 20 نوفمبر 2008, 10:06 am

اقتراحك وجيه بس الخوف يقولوا قلعنا هدومهم !!!!!!!

ونخش فى مشاكل اكبر من الاتهام بالسرقه
والسرقة تبقى اخف من الاتهامات ..............!!!!!!
مش كدة بالله ؟؟!!!
وتبقى تفتش لى وصف حرامى ما تلحق!!!!!!!!!!!
الرجوع الى أعلى الصفحة اذهب الى الأسفل
الطيب الامام الطيب
قلم ذهبي
قلم ذهبي


عدد الرسائل : 1225
العمر : 43
الاقامة : السعودية
المهنة : محاسب
مزاجك اليوم :
تاريخ التسجيل : 27/07/2008

مُساهمةموضوع: رد: قنصلية الجريف   الخميس 20 نوفمبر 2008, 10:14 am

اتوقعت رد زى ده والله حيرتونا انت وعصام نجيكم من هناء تجيونا من هناء
الرجوع الى أعلى الصفحة اذهب الى الأسفل
عصام عبدالصادق
قلم فضي
قلم فضي


عدد الرسائل : 429
تاريخ التسجيل : 23/09/2007

مُساهمةموضوع: رد: قنصلية الجريف   الخميس 20 نوفمبر 2008, 12:21 pm

الأحداث أتت سراعاً والجزء الرابع ترقبوهوا يوم غدَ بأحداث ساخنة
الرجوع الى أعلى الصفحة اذهب الى الأسفل
عمر حسن حمزه
عضو فعال
عضو فعال


عدد الرسائل : 146
تاريخ التسجيل : 03/06/2008

مُساهمةموضوع: رد: قنصلية الجريف   الخميس 20 نوفمبر 2008, 3:58 pm

أخي القنصل أبو تراجي

أرى أنك وافقت على المحكمة وشرعيتها وهذا يثبت حسن نيتك ، و إني معك بأن حل الخلافات عبر الطرق الودية و التحكيم و المحاكم هو مسلك حضاري. و لكن توخى الحذر و أقترح عليك رفع مذكرة لمجلس إدارة جمعية الجريف شرق السيد/ الزين دفع الله و السيد/ بشير عبد الله نابري حتى يكونوا هيئة عليا مشرفة على المحكمة.
الرجوع الى أعلى الصفحة اذهب الى الأسفل
الهندي بشير نابري
قلم ذهبي
قلم ذهبي


عدد الرسائل : 2809
الاقامة : المملكة العربية السعودية - الريــاض
المهنة : Computer programmer
مزاجك اليوم :
تاريخ التسجيل : 08/09/2007

مُساهمةموضوع: رد: قنصلية الجريف   الجمعة 21 نوفمبر 2008, 12:13 am

عصام عبدالصادق كتب:


وهنا وسط القاعة يقف أحد الحاضرين ويقول للقاضي .. لا ... لا يا مولانا إسمه ليس له علاقة وده سماهو جدو على / الشريف الصديق الهندي .. لكن عشان الصورة تكون واضحة ليك أصلوا الهندي ود خالي ده أكمل دراسته في الهند.. عشان كدة متأثر شوية .. لكن شوية شوية حا يكون طبيعي زينا كدة.
القاضي : يطلب من المتداخل وبلهجة قوية .. من الذي إذن لك بالتوضيح .. وإنت فاكر نفسك وين .. شوف والله لو تدخلت بكلمة واحدة تاني .. إنت عارف كويس شنو البيحصل .. أجلس !! وكانت لهجة حادة جداً من القاضي .. وطبعاً الراجل طلع الطيب بخيت.

ههههههههههههه ابدعت ياعمنــا عصــــام إبداع فوق ابداع ... وتشكيل وسيناريو عجيب تطرقت به لكثير
من المحاور .. ووضعتني في المحاكمة واستجواب شديد لم يمر علي بحياتي ولم استطع تخيله حقيقة
ولما اتقابلنا وكلمتي عن المحكمة دي قبل أن اقرأ البوست .. الحقيقة تفاجئت كثيرا لما قريت البوست
وشفت الكمل الهائل من الإبداع الذي سكبته هنــــا وصياغتك لمجريات وأحداث المحاكمة ...
أما االطيب بخيت بعد ما طلعنــا من المحكمة حلف طلاق بالمية وقال علي الطلاق في ميه القاضي ده أكان ألبد ليه
في فريق الزريبة مما يجي ماشي بعربته أحرش فيه الشفع يفلقوهو بالطوب .. ينهرني كيف الزول ده
الهندي ما صحيي ولد خالي هو الخشرو بيناتنا شنو .... ههههههههه
الرجوع الى أعلى الصفحة اذهب الى الأسفل
http://aljraif.forumotion.com
الهندي بشير نابري
قلم ذهبي
قلم ذهبي


عدد الرسائل : 2809
الاقامة : المملكة العربية السعودية - الريــاض
المهنة : Computer programmer
مزاجك اليوم :
تاريخ التسجيل : 08/09/2007

مُساهمةموضوع: رد: قنصلية الجريف   الجمعة 21 نوفمبر 2008, 12:20 am

عصام عبدالصادق كتب:


وفي هذه اللحظة يلتفت أبو تراجي لمن هو خلفه ويقول له والله لو سألوا عصام ده قالوا ليهوا نواجز دي شنو ما يعرفها .. ولسوء حظه لم يتبين أبو تراجي من هو خلفه .. وطلع ود سنقد وباقت أبوتراجي مباشرة وقال له ها اللتخة ده أحترم نفسك وعاين قدامك .. وبعدين أتعلموا مخارج الحروف كويس وأتكلم وأسعدي في زمتك الهندي ده قال نواجذ والا نواجز .. وفي هذه اللحظة تدخل معز عبدالمنعم والذ يجلس بجانبه وقال له .. سيبو .. سيبو .. ده دنقلاوي .. وفي هذه اللحظة أبو تراجي كان حا يتهور ولكن ربنا ستر ومعز السماني أمسكه من يده لتهدئته.. طبعاً كل هذا المشهد بعيد عن أعين القاضي والمشغول بأقوال الهندي.

حاولت أن أتخيــل الموقف وليتني لم أتخيل ضحكت من الأعماق حتى مسكتني عشراقة بالجد جدا ولحقوني بالمويه سريع
وأنا أتخيل الصرة في وش وليد سنقد وأدى أبو تراجي ضربة في الراس بيورا وهو بيقول ليهو ها اللتخه ده ....
وباتخيل في شكل أبو تراجي ومعز السماني ماسكة يهدي فيهو ..... والجميل في الأمر أن الضرب كله تحت الحزام والقاضي ما جايب خبر .... ذكرتني هذه الأحداث باسلوب محمد عبدالله نابري عمي الكبير .. عندمــا يكون في المحكمة
وفي قضية مع أي واحد من المستأجرين لدكاكين جدي بالمنطقة الصناعية ببحري ... دوما ما يحاول أمحمد استفزاز
المستأجر بصورة قوية وبكلمات مُرّه لا تنبلع أبدا ليثير حفيظته ويثور أمام القاضي وطبعا أمحمد عمي بيضربه بالبارد
قاصدا إثارته أمام القاضي والمسكين يثور والقاضي يقوم فيهو نهير .. وهنا تتكون هزة نفسية في نفس المدى عليه وهو
المستأجر وانطباع لدى القاضي عنه وهذه من الأسباب التي يستفيد منها أمحمد عمي وهو المدعي .. هههههه
أضحك الله سنك عمنــا عصــــــام وعساها مبتهجة سنين عمرك
الرجوع الى أعلى الصفحة اذهب الى الأسفل
http://aljraif.forumotion.com
الهندي بشير نابري
قلم ذهبي
قلم ذهبي


عدد الرسائل : 2809
الاقامة : المملكة العربية السعودية - الريــاض
المهنة : Computer programmer
مزاجك اليوم :
تاريخ التسجيل : 08/09/2007

مُساهمةموضوع: رد: قنصلية الجريف   الجمعة 21 نوفمبر 2008, 12:24 am

عصام عبدالصادق كتب:

ممثل النيابة: يا هندي الطاقية محل الدعوى .. هل لديك أي خلفية عنها
الهندي: نعم وآخر مرة شاهدتها قبل إختفاؤها بأسبوع وكان يعتمرها عصام في فطور الجمعية خلال شهر رمضان هذا العام 1429هـ وتم توثيقها في عدة لقطات بالصورة.

أيوا شفتها حتى كمان كانت معووجة بالجنبه وعمنا عصام لابسهـــا وشايل الكيس داك ..السيدو الرسلو جا البلد
قبال الكيس ما يصـــــل .. الطيب بخيت ياجماعه ما يسمعني
الرجوع الى أعلى الصفحة اذهب الى الأسفل
http://aljraif.forumotion.com
الهندي بشير نابري
قلم ذهبي
قلم ذهبي


عدد الرسائل : 2809
الاقامة : المملكة العربية السعودية - الريــاض
المهنة : Computer programmer
مزاجك اليوم :
تاريخ التسجيل : 08/09/2007

مُساهمةموضوع: رد: قنصلية الجريف   الجمعة 21 نوفمبر 2008, 12:45 am

خضرحسن الفضل كتب:
إستــــدعـاء الشـهـــود لمحـاكمـات مـن إخـرج عـصـام عـبدالصـــادق تـجعـل سخـانـة كـرسى عـبدو بـرداً وسلامـــاً ونـعيمـاً على الجـالسين عـليـه...
الهندي: لا يا مولانا أنا ما كنت بضحك .. دي كانت قحة ساي .. يعني عشراقة { والله مـبالغـة مـنك}
عـصـام عـارف نـفسيـات كـل مـن فى المنـتـدى ومـافى حـاجة بـتـفـوت علـيه لا فـكـرة شـاردة ولا غـزالــــة واردة والهــنــــدى ولـد حـــــنـيـن لو قـرصـته بـاعـوضـة فى أصــبـعـه يـمـد لهـا يـده كـلهـا ويـقـول ليهـا بـاكـرالمـساء جـيبى مـعاك أهـلك وجـيرانـك لأنى مـعـزوم فـطـــور عـريــس مـع نـبيـل... وسبـب إرتـباكـه إنـه بشـير أبـوه لابــد فى تـاكسى بـره ومغـطى وجـه زى الطـوارق لأنـه عـيـب كـبيـر فى حـق الأسرة... النـاس تـقول عـلينـا شنـوا؟؟؟؟؟ ولـدهـم دخـلوه المحـكــمـة!!! عـشان كـدى مـافى واحـد عـارف إلا الطـيب بخـيت.

عمنـــا الخضر تحياتي وأشواق كتيره ومشتاقين كتير كتير ... الشي المبالغ فيهو أكتر أني إتخيلت أني جاي على

المحكمة فعلا وقبل ما أقرأ كلامك قلت شوفو بالله كشف الحال السواهو لينا عمنا عصام في الموضوع ده وجابنا في
المحاكم وطبعا ما اتصورت نفسي أبدا لكن خيالي سرح لأنو ان شاء الله بس أبوي ما يجي ماري بالبوست ده وينكشف
حالنا معاهو أكتر وتبقى الفضيحة فضيحتين ..هههههه بعد شوية في مشاركتك لقيتك جبتها وجبت أبوي معاي لاحولة
ولاقوة الا بالله العلي العظيم .. لابتفوت فكره شاردة ولاغزالة واردة ....... شكرا للأيام الجمعتنــا بيكم ويعيش منتدى
الجريف ويدوم خيرو يااااااارب .
أما كرسي عبدالله بعد ما اتململ فيهو وقال عايز يزوغ لكن مشكلته مضروب فايروس المنتدى وغالبه يغيب كلو كلو
وأنا استعديت ليهو واتمهلت ليهو بيرواقه وربنا يكون في عونه لكن راجنكم بالتقيل تجو علينا بهنــاك . لكن البحلكم ويحلنا تاني من المحكمة دي شنو ؟؟ ههههههه
[/size]

خضرحسن الفضل كتب:

وسمعـنا أنـه فى الجـلسة الجـاية جـايـبـيـن فيـهـا عـبـد الله ودأمـحـمـد ودا مـافى خـوف عـلـيه لأنـه نـاس هـب النـسيـم مستـعـدين يـشيـلوا المحـكـمة بى قـاضيهـا وكـراسيهـا ومـن فـيهـا...وأولاد حـاج الأمـين مـستـعـديــن يجـــيـبـوا كـل المـعـلومـات عـن الـقـاضى وهـل هـو معـرس سودانـيــة أم مـصـريــة رغـم إحــتـــيـاطــــات عـصـام الأمـنيـة.

والله ربنا يستر على المحكمة والقاضي والشهود والناس البيجو مارين ساي اليوم داك ... لكن صدقني لو أمحمد عمي

حضر الجلسه مع عبدالله ولدو ياهو الطلع القاضي بيقد القفه وخلاهو يفتش للهوا والبحلو منو ...الله يستر وأبو تراجي
ياهو الركب التونسية ... الله يكضب الشينه

خارج النص :

أنا سمعت أنو ناس جريف قمر نص الجريف يمسكو الحرامي وبيدقوهو لحدي ما يقول ودوني القســم وكل فريق من
الحلة بيناوله لللفرق التاني يآخد حقو من الحرامي ويآخد نصيبه في دق الحرامي
وناس كركوج نهاية الجريف قالوا بيرصصوهو سريع سريع وينهو منو يخلو الحرامي زاتو يتحير في الحصل ليهو ده
جنسو شنو
لكن ناس هب النسيم في بداية الجريف قالو بيقطعوا اضنيهو وبيختوهو في شوال ويرموهوا البحر .. لاحوله ولاقوة إلا
بالله العلي العظيم ... صحي الكلام ده ...؟؟ والله الحرامية رزقهم مقطوع قطعه شديده في بلدنــا وليهم الله


خضرحسن الفضل كتب:

ود سنـقــــد كـان يتـكـلـم بقــوة بـحـكم العـادة والـريـادة فـهـو رائـد ومـشرف فى زمـن العــولمـة ومتـعـود عــلى نـهـر وقـهـر المتـداخـليـن بـسؤ فى البـوستـات.
ودمتم لنـا
خـضر حـسن[/size][/size]

هههههههههههههههههههههههههههه لكن كلمت ها التخه ده .. عمنــا عصـــام نكتها من وين ما معروف والله تصوير

وسناريو بالجد رائع وفوق كل الوصف ......
دمتم لنــــا مصادر للفخر وأمكنة لصفاء الروح ونقاء السريرة
وعوالم للإشتهـــاء والإتكـــاء على ضفاف الأمنيات الحالمة بلقــــاكم الذي سندفع مقابله ثمناً من العمر .
الرجوع الى أعلى الصفحة اذهب الى الأسفل
http://aljraif.forumotion.com
عصام عبدالصادق
قلم فضي
قلم فضي


عدد الرسائل : 429
تاريخ التسجيل : 23/09/2007

مُساهمةموضوع: رد: قنصلية الجريف   الجمعة 21 نوفمبر 2008, 9:03 am



الجلسة الرابعة من مداولات المحكمة في قضية الطاقية:
في الجلسة السابقة طلب القاضي حضور عبدالله ود نابري... وكان قد تقدم بخطوات سريعة وكأنه كان منتظر دوره. بعدها رفع القاضي الجلسة وحددت بتاريخ اليوم 21/11/2008 لسماع أفادات عبدالله محمد نابري.
الحاجب محكمة.....
بعدها بدأ الإعلان عن إسم عبدالله ود نابري ... ولكن إتضح أنه غير موجود .. وبعدها تقدم أحد الحضور وعرف بإسمه (عبد اللطيف محمد عبد اللطيف عبد الرحيم محمد احمد عابد) المشهور بـ عبدو كمبيوتر.. وأستأذن من القاضي وقدم له عريضة وفيها يفيد بعدم تمكن السيد/ عبدالله محمد نابري من الحضور بسبب تواجده في الكرسي الساخن ... وربما تواجده هنا في المحكمة يتعارض مع أحداث الكرسي الساخن .. وفيها يستقل البعض هذا الوضع وتوجه له عدة سهام تغير مجرى القضية بالكامل.. وأيضاً سوف يتم إستقلالها في الكرسي الساخن .
وعليه وافق القاضي بعد النقاش مع مستشاريه .. وبناء عليه تم إستبعاد عبدالله نابرى من هذه الجلسة..
وبعدها سأل القاضي عن عمر حسن حمزة هل هو موجود ؟.. ومن وسط الحضور أتى صوت عمر .. نعم أنا حاضر.. فتقدم عمر إلى المنصة وطلب منه القاضي أن يعرف بنفسه ..
بدأ عمر بالتعريف بنفسه وأضاف إلى المعلومات بأنه ملقب بأبو مصعب .
القاضي: ألديك علم بسبب تواجدك في هذه القضية.
عمر: أتينا للوقوف مع الحق .. ولنظهر الحقيقة.
القاضي: أنا سؤالي كان واضح عن سبب تواجدك ولم أقل تواجدكم .. فكيف تقول أتينا ومن أنتم.
عمر: أنا أتكلم بإسم الشرفاء ..
القاضي: معنى ذلك أن كل الحضور هم شرفاء.
عمر: البعض منهم.
هنا يستأذن ممثل النيابة القاضي لطرح بعض الأسئلة على عمر.
ممثل النيابة : يتقدم خطوات نحو عمر وكأنه يعرفه من قبل .. وبدأ بتحية عمر .. كيف حالك يا أبا مصعب .. الحمزاوي .. وكلمة الحمزاوي نجد ممثل النيابة نطقها بتوضيح بإئن وكأنه يرمي لشئ ما .. من ورائها.. ومنها بدأ الإرتباك على وجه عمر .. وفي هذه اللحظة أتى صوت من الصفوف الخلفية ( الله أكبر ) .. ويضرب القاضي على الطاولة ويطلب الهدوء .. حيث لم يتبين مصدر الصوت القادم .. وربما يرجح البعض أنه ود ريا .. وهذا الأمر مشكوك فيه لإعتبارات عدة يعلم بها العالمين ببواطن الأمور ..
ممثل النيابة: يا عمر هل أنت خجلان من لقب أبو مصعب الحمزاوي
عمر: ولم الخجل؟ .. وطالما أتتني هذه التسمية من أستاذنا خضر حسن فأنا أعتز بها جداً ..
ممثل النيابة: طيب وضح لي بصراحة .. لم إرتبكت عندما ناديتك بها.
عمر: والله لم أتوقع أنكم ملمين بكل هذه المعلومات .. وخصوصاً هذه التسمية متداولة في نطاق ضيق جداً .. أضف لذلك ربما يستقلها البعض لمآرب أخرى كما قال أخوي الشفيع الجزولي.. وبعدين مافي حاجة بتستدعي الخجل .. ومثال لذلك نجد المستشار الفني حاج على المنشاري مشهور بحاج علي العنز .. ونجده يعتز بهذه التسمية ويتفاخر بها .. وفي هذه اللحظة وبصورة عنيفة نجد حاج على وقف وبدأ يتكلم .. يا مولانا أمن على هذه النقطة وإنت براك شائف الراجل ده جاب سيرتي .. وأنا عارفو بيرمي لي شنو وما تشوف الكلم السمح ده .. وأنا عارف دي حركات بتاعت ناس كركوج العمي .. وهنا ياتي صوت الطيب بخيت ويقول لحاج على .. حرم عنز .. ويرد عليه حاج علي مباشرة .. ها العوير ده أسكت ساهي .. وتضج القاعة بالضحكات وخصوصاً لأصحاب التوجهات الخاصة بما فيهم أبو تراجي والذي أعجبه رد حاج على مع إنه يقف في الضد نحوه ... وفي هذه اللحظة أتى صوت هادئ ولكنه مقرون بالزعل والإشمئزاز وقال لحاج على .. لا حول ولا قوة إلا بالله .. الله يهديك .. الله يهديك .. ويا خي مافي داعي للكلام الزي ده .. يا خي أستغفر ربك .. أستغفر ربك .. وبعدين إنت ما طالع من كركوج دب أبداً وأخوانك لحم ودم ناس بشير حاج ابراهيم وربنا يديهم العافية ما بتطلع منهم العيبة .. يا خي أستغفر ربك .. وهنا وضحت معالم المتحدث وطلع محمد كمال الدين .. ورد عليه حاج على .. لكن يا أبو المقداد إنت براك شائف عمر بيقول في شنو .. لكن كمان أزيدك في القول بأننا تربطنا بكم وبهم صلة الرحم بي جدنا الزين من ناحية والدي .. وكان ما عارف عاوزك تعرف أنو حبوبتنا بلد النبي بنت بابكر الزين هي شقيقة حاج المبارك .. وفي هذه اللحظة أتت ضحكة مجلجلة .. وإتضح أنها ضحكة الشفيع الجزولي وأعقبها بقوله والله يا عمر بالغت عديل كدة .. شوف بالله كيف وفعلاً والله طلعتو لينا من طوروا وبدأ يطلع في حاجات من بيت الكلاوي .. والله الناس ديل ما بينفع معاهم إلا كدة .. وهنا إلتفت محمد كمال الدين نحو الشفيع .. وقال له لا يا الشفيع يا خي الناس ديل في النهاية أخوان وأولاد منطقة واحدة .. وكل الحضور ده عاوزين يصلوا للحقيقة وأنتم كمان لكم دور كبير بتقريب وجهات النظر .. رد عليه الشفيع مع إحترامي ليك يا محمد .. ووجهات نظر بتاعت شنو .. يا خ ديل مجرجرنا في المحاكم .. وأسعدي بالله في زومتك في واحد كان بيتوقع يلاغيك بعد المدة الطويلة دي في محكمة ..
وفي هذه اللحظة يتدخل القاضي بعد المداخلات السابقة ويطلب من الحضور الإلتزام بآداب المحكمة وإلا سوف يتم طرد كل المتداخل.
ممثل النيابة : يا عمر كنت حا تشعل لينا نار فتنة لكن الحمدلله ربنا ستر .. طيب يا عمر شوف المداخلة دي في بوست القنصلية هل هي لك؟
أبو مصعب كتب:
أولاً أود لفت الإنتباه لمفردة "الطاقية" و نستحضر الأقوال والأمثال المتداولة :
"
فلان لبسوه الطاقية" "فلان يضع طاقية ده في ده""شيخ فلان لبس الطاقية" ... الخ ......
سعادة قنصل الجريف شرق بجدة،
لك التحية والتقدير،
أفيد سعادتكم بأنه قدعرض علي مبلغ من المال بوساطة أمريكية(الحاج عبد الصادق) حتى أقف عن دعم قضيتكم العادلة. وحينما وجد الوسيط مني الرفض،أخذ يحلل بدبلوماسية بالغة بأن ذلك يصب في مصلحة المنطقة.
عمر يطلع على المداخلة:
عمر: نعم هي كلماتي وده خطي ولكن المداخلة ليست مكتملة
ممثل النيابة: يعني هي كلماتك.
عمر : نعم

نواصل

الرجوع الى أعلى الصفحة اذهب الى الأسفل
عصام عبدالصادق
قلم فضي
قلم فضي


عدد الرسائل : 429
تاريخ التسجيل : 23/09/2007

مُساهمةموضوع: رد: قنصلية الجريف   الجمعة 21 نوفمبر 2008, 9:08 am



نواصل:
ممثل النيابة: يعني هي كلماتك.
عمر : نعم
ممثل النيابة : ماذا تعني بالأمثال التي وضحتها
عمر : والله دى أمثلة متداولة وأنا هنا أستعملتها للتعريف بمدلولات الطاقية
ممثل النيابة: طيب يا عمر عندك أي خلفية عن الطاقية دي
عمر: نعم أنا بعرفها جيداً ولكن أشك في القصة التي أحيكت حولها.
ممثل النيابة : كيف ولماذا وعلى أي أساس بنيت شكك ؟
عمر: الطاقية إذا كانت بالمواصفات دي أنا كنت أول واحد أخذتها لأنها كانت في متناول يدي ..
ممثل النيابة: ربما أنك لا تعرف قيمتها .. ولو عرفت قيمتها يعني كنت حا تأخذها؟
عمر: والله ربما.. وكل شئ جائز
ممثل النيابة: طيب يا عمر أنت ذكرت بأنك تعرضت لضغوط أجنبية للتوقف عن دعم القضية .. هل هذا صحيح .. ولم إختاروك انت بالذات؟.
عمر : نعم تعرضت لضغوط من هذا النوع .. وربما تم أختياري لمعرفتهم بعلاقتي الوطيدة بين الطرفين المتخاصمين. ولكنهم تناسوا الخطوط العريضة التي أسير بها في حياتي.
ممثل النيابة: ممكن تشرح لينا شوية عن خط واحد من هذه الخطوط.
عمر: والله يصعب ذلك في هذه الجلسة .. وخصوصاً مثل هذه الأمور تمس سيادة منطقتنا الجريف.
ممثل النيابة : طيب .. طيب .. أنا متفهم للوضع .. طيب يا عمر هل لديك علم بأن أحد أصحابك تعرض مؤخراً لموقف مماثل داخل القنصلية وأخذت نظارته الإيطالية الصنع .. وهو العضو الفعال في جمعية أبناء الجريف بالرياض سابقاً السيد/ حسن الصاوي.
عمر: والله هذه واحدة من المؤامرات التي تحاك ضد الحمل الوديع أبو تراجي.. وخصوصاً نحن نعلم جيداً بمآرب حسن الصاوي وخصوصاً هذا المنصب يحلم به منذ فترة طويلة .. لذلك نجده حاقد على أبو تراجي .. وسوف يعمل المستحيل لينال شرف الإستحواذ على مبنى القنصلية.
وهنا من وسط القاعة أتت أصوات إستهجان ضد كلمات عمر هذه .. وبعض الحضور يقول بصوت عالي والله يظهر عمر حسن ده عملوا ليهوا غسيل مخ .. أو يكون باع القضية .. والله الزمن ده كل شئ أصبح ممكن وجائز .. وهنا يضرب القاضي على الطاولة ويطلب الهدوء.
ممثل النيابة:يا عمر ألم تأتيك ذرة شك واحدة بأنو أبو تراجي مريض وربما يقوم بهذه الأشياء دون إرادته.
عمر : والله أشك في ذلك .. بالرغم من أنه وضح ذلك في الجلسة الأولى بأنه بيتعالج .
ممثل النيابة : تشك فقط ولكنك لا تجزم
عمر : والله .. والله .........
ممثل النيابة : ها يا عمر بتفكر في حاجة .. تكلم ولا تتردد .. ها .. تكلم
عمر لا .. لا مافي حاجة.
ممثل النيابة طيب .. طيب يا عمر أنت ترددت كثيراً على دار القنصلية .. ما لا حظت أو حصل لك أي موقف مشابــــ .....
هنا يقاطعه عمر ... لا .. لا ليس لهذه الدرجة لكن أنا ما متذكر أني فقدت حاجة داخل القنصلية ..
ممثل النيابة : أنا عاوز إجابة قاطعة
عمر: والله صعبة جداً أفصل في هذه النقطة
هنا حدث بعض الإرتباك على وجه عمر وكأنه يخفي معلومة ما
ممثل النيابة: طيب .. طيب يا عمر أهدأ شوية
عمر: والله أنا هادئ جداً وطبيعي جداً
ممثل النيابة : طيب يا عمر عاوزك تشرح لينا متى كانت آخر مكالمة بينك وبين الوجيه حسن الصاوي
عمر: والله أنا ما عارف كلمة وجيه دي جبتها من وين .. وعموماً برضو ما متذكر
ممثل النيابة : ما متذكر أبداً ..
عمر : إحتمال قبل أربعة أو خمسة يوم.
ممثل النيابة : قبل فقدانه للنظارة أو بعد؟
عمر: كلمني قبل وبعد فقدان النظارة
ممثل النيابة: طيب علمت بفقدان نظارة من أبو تراجي أم من حسن
عمر: يتوقف قليلاً .. ويقول والله ما متذكر لكن يخيلي من حسن.
ممثل النيابة: يخيل ليك .. يا سلام عليك يا واعي
عمر: بغضب شديد .. يا خي أنا كلامي واضح ومافي داعي للتلميحات دي.
ممثل النيابة: مافي داعي للزعل ويعدين أنا ما قلت حاجة ومعجب بوعيك .. ودي فيها حاجة
طيب يا عمر عندك فكرة إنو حسن فقد قلم حبر باركرأيثضاً داخل القنصلية
عمر: والله دي معلومات جديدة وأبو تراجي ما جاب لي سيرة بيها
ممثل النيابة: وحسن ما جاب سيرة أيضاً
عمر : لا والله ما عندي فكرة .. ولكن بتوقع أنها جزء من الحروب النفسية ضد أبو تراجي والتجني عليه
ممثل النيابة : يا عمر نحن ملمين بكل تفاصيل حياتك ولا يختلف فيه إثنان .. ولكن الشئ الملاحظ أنك في هذه الأحداث دخلت مباشرة وأعلنت وقوفك مع أبو تراجي وبدون تخفظات .. وفي المقابل نجد أن أبو تراجي أمور كثيرة تثير الريبة والشك نحوه ولكن برغم ذلك نجدك دخلت بهذه الكلمات.
عمر حسن كتب :
بحكم متابعتي المتواصلة للقنصلية ذات السجل الحافل بالخدمات و المواقف ذات البعد الإستراتيجي والكثير يعلم ذلك جيداً. لذلك أرى أن موضوع الطاقية و ماصاحبة من ملابسات ماهي إلا زريعة من صنع قوى الإستكبار للنيل من وحدة الصف وتعطيل عجلة التنمية التي تشهدها المنطقة. و أقترح تكوين لجنة للبحث والتحري في كواليس هذا الإتهام وتعريته لتتجلى الحقيقة واضحة للجميع.
ممثل النيابة : ده كلامك يا عمر
عمر: نعم إنها كلماتي
ممثل النيابة: ماذا تعني بالبعد الإستراتيجي
عمر: والله يا أستاذ أنا بعتبرها رمزية للغة المتداولة اليوم والتي أصبحت جزء من ثقافتنا والتي ينهل منها أبناؤنا حالياً .. وحتى تكون لكلماتي نوع من المصداقية لابد من أبدأ حديثى بكلمة .. حقيقة .. أو كلمة أحسب أن .. وجميل لو أضفنا إليها رتق النسيج الإجتماعي .. لذا كلمة بعد إستراتيجي متداولة في جميع الأصعدة من أعلى هرم في السلطة .. إذن أنا أستغرب في كونك توقفت في هذه الكلمة بالذات.
هنا يتدخل القاضي: يا عمر أرجو أن لا تطلع عن نطاق الموضوع وبلاش من الرمزيات التي سوف تجرجرك على ما لا تحمد عاقبته.
وهنا يأتي صوت من الحضور .. يحي العدل .. الله أكبر ... .. الله أكبر ... .. الله أكبر ... .. وربما يكون المتداخل الطيب الإمام أو الطيب نصرالدين .. والله يكضب الشينة وما يكون ........
ممثل النيابة : طيب ماذا تعني بفقرة ماهي إلا زريعة لقوى الإستكبار .....................
عمر: والله أعتقد ينطبق عليها نفس التوضيح السابق وأنا لا أريد تكراره إحتراماً لكلام مولانا القاضي.
ممثل النيابة : يعني برضو بتعتبرها كلمات رمزية
عمر : نعم .. نعم أنا على نفس الرأي.
ممثل النيابة : يا عمر لك مداخلة جديدة في بوست القنصلية وعاوزك تطلع عليه لتأكيد صحته:
عمر حسن كتب :
أخي ابو تراجي أرى أنك وافقت على المحكمة وشرعيتها وهذا يثبت حسن نيتك ، و إني معك بأن حل الخلافات عبر الطرق الودية و التحكيم و المحاكم هو مسلك حضاري. و لكن توخى الحذر و أقترح عليك رفع مذكرة لمجلس إدارة جمعية الجريف شرق السيد/ الزين دفع الله و السيد/ بشير عبد الله حتى يكونوا هيئة عليا مشرفة على المحكمة.
عمر حسن: نعم هذا خطي وكلماتي.
ممثل النيابة: أنت ذكرت لأبو تراجي بأن يتوخى الحذر .. بمن تقصد؟
عمر: أعفيني من الإجابة
ممثل النيابة : لابد من التوضيح
القاضي يوافق على إعتراض عمر ويطلب من ممثل النيابة بتغيير صيغة السؤال
ممثل النيابة : أنا أكتفي بذلك .. شكراً يا عمر .. وممكن تجلس ..
ممثل النيابة : شكراً يا مولانا وأنا أكتفي بهذا القدر من الإسئلة .. ونرجو منك إستدعاء السيد / حسن الصاوي في الجلسة القادمة لأهميته في هذه القضية وسماع أقواله .. ونرجو أيضاً من عدالتكم بحضور وتواجد رئيس جمعية أبناء الجريف لعدة دورات سابقة وهو الأستاذ بشير ورئيس الجمعية الحالي الزين دفع الله
وفي هذه اللحظة يرفع القاضي الجلسة وتم تحديد يوم ../../2008م للجلسة القادمة وسماع إفادات بعض الشهود ..وحضور حسن الصاوي بصفته وشخصه ويعترض القاضي على إستدعاء بشير والزين في الوقت الحاضر إلا إذا دعت الضرورة في مرحلة قادمة وبقرار سيادي.
رفعت الجلسة
محكمة

الرجوع الى أعلى الصفحة اذهب الى الأسفل
الطيب الامام الطيب
قلم ذهبي
قلم ذهبي


عدد الرسائل : 1225
العمر : 43
الاقامة : السعودية
المهنة : محاسب
مزاجك اليوم :
تاريخ التسجيل : 27/07/2008

مُساهمةموضوع: رد: قنصلية الجريف   الجمعة 21 نوفمبر 2008, 9:48 am

المبدع والراوئى العالمى العصام احيك ورايك شنوا لوا ادينا القصة لتلفزيون السودان كى نطلع شوية من دموا التقيل ده لك الود وحيرتونا انت وابوتراجى
الرجوع الى أعلى الصفحة اذهب الى الأسفل
عمر حسن حمزه
عضو فعال
عضو فعال


عدد الرسائل : 146
تاريخ التسجيل : 03/06/2008

مُساهمةموضوع: رد: قنصلية الجريف   الجمعة 21 نوفمبر 2008, 2:59 pm

أعلموا أيها الســـادة بأني أخذت الى تلك المحاكمة عنوة ومورست معي كل أنواع الضغوط والقهر، لذلك أطلــــب اللجــــوء
الرجوع الى أعلى الصفحة اذهب الى الأسفل
 
قنصلية الجريف
استعرض الموضوع السابق استعرض الموضوع التالي الرجوع الى أعلى الصفحة 
صفحة 4 من اصل 7انتقل الى الصفحة : الصفحة السابقة  1, 2, 3, 4, 5, 6, 7  الصفحة التالية

صلاحيات هذا المنتدى:لاتستطيع الرد على المواضيع في هذا المنتدى
............ :: المنتديات الرئيسية :: الجريف للمناسبات والتراحيب-
انتقل الى: