............

حبابك عشره يا زائر
 
الرئيسيةالتسجيلدخول

شاطر | 
 

 قـــديمك ... نديمـــك ..

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
رحال
عضو نشط
عضو نشط


عدد الرسائل : 86
تاريخ التسجيل : 03/09/2007

مُساهمةموضوع: قـــديمك ... نديمـــك ..   الثلاثاء 13 نوفمبر 2007, 3:27 am

سلام يا حبان ، وشوق رويان.


اولا بي التبادي كلامي ده قديم وضارب في القِدم وكلو حديث ناس ضهاري وريف، دحين كدي النحدثكم عن تراثنا ده، باقي جنوي اليومين ديل عندهم مشكلة في معرفة الحاجات دي ، والظروف ما معروفة إمكن بكره تتورط في سؤال وتبقى في اليخارجك منو.

بداية نعرف الفرق بين السعف والحنقوق
طبعاً هم الاتنين من اوراق شجر النخيل ( وانا هنا بقصد الصفق عشان الفرع او العود الذى توجد عليه الاوراق نسميه الجريد) بس السعف بيكون اقصر وانعم والين بعكس الحنقوق بيكون اطول واخشن وانشف، وخلونا نركز على انشف دى يعني الحنقوق ما بيتحمل الثني يعنى اى لفه حاره بتكسر ضهر الحنقوقه، لكن السعفه بتكون طايعه ولينه وبتخش اى حته يعن أي ملف ممكن وبى سهوله شديده، يعني ممكن نلويها بدون اى صعوبات بس مرات بتحتاج ليها لى حبة بله بى مويه عشان تطيع اكتر، ويدخل فى كثير من المصنوعات اليدويه مثل البرش والعلجه والتبروقه والنطع والهبابه والقفه والطربوش، اما الحنقوق فأكثر استخدامه فى المقشاشه والطبق والريكه( من داخل الطوف فقط) وحبال السعف( مع انو اسمها حبال سعف وليس حنقوق وذلك لان كلمة السعف تطلق على الاثنين معاً لدى العامه


الفرق بين البِرش والعلجه
طبعاً فى ناس كتااااار بيفتكرو انو العلجه ياها البرش، وكدى خلونا قبل نعرف الفرق بينهم نعرف اوجه الشبه، فكلاهما يصنع من السعف على شكل ضفاير تحاك على بعضها بشكل متوازى، بس ما ننسي انو بيتعمل ليها زيق (فريم) خارجى عشان ما تتنسل، وهى عادة تكون بحجم السرير او اكبر قليلاً.
اها الفرق بين البرش والعلجه انو البرش بيكون بلون السعف الطبيعي يعني اصفر(بيجي للحناكيش ) عدا الفريم الخارجي بيكون لون آخر، وجرت العاده على استخدامه فى حمل الموتى الى مثواهم الاخير، اما العلجه فهي ذات آلون ذاهيه (طبعاً لانو بيستخدم فيها السعف الملون عن طريق غلى الصبقه، صبغة اللون يا بنات ما تقومن تستخدمن صبغة الحنه ) وجرت العاده على استخدامها فى المناسبات السعيده ، طهور ولا نفاس ولا عرس (بس ناس البندر بيستخدموها فى الجرتق فقط


التبروقه والنطع
التبروقه عباره عن ضفائر تنسج من السعف وتحاك بشكل حلزونى حتى تصبح بحجم دائرة قطرها مترين تقريباً، وتون عاليه عند طرفها ( اى محيطها الخارجي) وتستخدم كمصلايه لآداء الصلاة وبها حبل من الصوف فى طرفها العلوي منسوج بشكل جميل يتم تعليقها منه على الجدران بعد الانتهاء من اداء الصلاه حتى لا تتسخ.
اما النطع فهو لا يختلف عن التبروقه إلا فى انه يكون مفتوح فى وسطه اى انه به فتحه على شكل دائرة فى منتصفه، ويستخدم كفرش حول حفرة الدخان.
اما الطوف فالمقصود به الشوط او إكمال دائرة حول المحور، وكلما كملت دائرة حول المحور فى الطبق او الريكه تسمى طوف، والفرق بين الطبق والريكه ان الطبق يستخدم فيه قش القمح ( سيقان القمح) بعد صبغه بآلوان زاهيه بطريقه تجعله ملتف حول الطوف بشكل ثابت عن طريق المخرز، ويستخدم فى غطاء صينية الطعام.
الريكه شبيهة بالطبق إلا انها تنسج من السعف بدلاً من قش القمح، كما تستخدم كإناء توضع عليه الكسره عند عواستها


نواصل فى شغل السعف
من مصنوعات السعف ايضاً
الكابدلو والمشلعيب
الكابدلو شكلو الخارجي ذى الزير
وفيهو غطاء من السعف ايضاَ
والغطاء مثبت بحبل، وهذا الحبل يستخدم فى تعليق الكابدلو الى السقف او الجدار
يستخدم لحفظ الاغراض والملابس والاطعمه الناشفه
اما المشلعيب فهو جداً وهو عباره عن حبال منسوجه مع بعضها بشكل متقاطع
ويعلق على السقف ويوضع فيه إناء الطعام كى لا تصل إليه الحيوانات خاصه القطط والكلاب


الفرق بين السِـعن والقِـربه
كلاهما يصنع من جلد الحيوان
بعد سلخه بعنايه ( يعني الجزار يكون حريف ما يخرم الجلد يقوم بعدين يدفق)
اها بعد يسلخو الجلد ويطلعوه بره يقومو يعملو ليهو دباغه بلدى
يعني يدوهو ملح ويخلوهو يجف، وبعد داك تاني يجو يبلوهو بى موية القرض عسان يبقى طرى ولين، وما ننسى انو اثنا عملية الدباغه يتم التخلص من الشعر، يعنى يخلو الجلد بدون شعر او صوف.
اها بعد عملية الدباغه بتجي عملية الخياطه، يعني يخيطو الارجل الثلاثه، تماماً وتترك الرابعه كفتحه تستخدم فيما بعد لإفراغ الماء من القربه والروب من السعن، وكذلك تترك فتحة الرقبه لصب الماء داخل القربه، او اللبن الرايب داخل السعن، والفرق بين القربه والسعن ان القربه تكون اكبر حجماً حيث يستخدم فيها جلد الضان او البقر، بينما يكون السعن اصغر حجماً وذلك لانه يصنع من جلد العتود(العنبلوق) غالباً.


الفرق بين اللبن الرايب والرواب والروب
ودى كلها مراحل بيمر بيها اللبن فى الطريق لعمل السمن البلدى
وتبدأ المرحله باللبن الحليب الذى يترك لمدة يومين حتى يتخثر فيصبح لبن رايب
ثم يتم تم سكب اللبن الرايب داخل السعن ( الشرح فى الاعلى) ثم يرج بشده لمدة من الزمن حتى ينفصل اللبن الرايب الى جزء سايل يسمى الروب وجزء متماسك يسمى الفرصه ( الزبده) وهذه الزبده توضع على النار لتصبح سمن بلدى.
اها نرجع لى الرواب
الرواب هو جزء متبقى من اللبن الرايب للمره السابقه، ترك ليساعد فى تخثر اللبن الحليب فى المره القادمه عند إضافته إليه.
الفرق بين البقجه والمخلايه
البقجه هى قطعه من القماش، وتوضع فيها الملابس والاغراض عند السفر والترحال، وتربط من اطرافها بشكل قطرى، يعنى كل ركنين متعاكسين يربطان مع بعض، ويستخدم العكاز (العصا) فى حملها على الكتف عادةً
اما المخلايه فهى عباره عن كيس يخاط من القماش، ويستخدم ايضاً لحمل الاغراض فى السفر
الفرق بين الشباك والطاقه
الشباك عباره عن فتحه رباعية الشكل فى جدار الغرفه تستخدم فى السماح بدخول وخروج الهواء من الغرفه، ويعمل لها درفه او مجموعه من الدرف من الحديد او الخشب او الزجاج، يعني نافذه بى لغة ناس الخرتوم.
الطاقه عباره عن فتحه فى جدران الغرفه، تتخذ عدة اشكال رباعيه وثلاثيه ودائريه، وتكون مفتوحه دائماً يعنى ما بعملو ليها حاجه تقفل وتفتح.

الفرق بين السدى والكراب
السدى والكراب هما مصطلحان يستخدمان فى سياجة العناقريب
يعني لمن يجو يعملو لى العنقريب حبال، بيكون الوسار مقسوم الى جزءين، واحد بالطول فقط، وهو الجز الصغير فى الاعلى، والتاني بالطول ومخلوف بالعرض بأشكال هندسيه منتظمه جميلة الشكل، اها الجزء الاخير ده بيسمى السدى، والاول يسمى الكراب، والكراب يستخدم لإعادة الشد عند ارتخاء الجبال بطول الزمن.



الفرق بين اللباب والضناب
اللباب عباره عن شريط من الجلد (حزام) يتستخدم لتثبيت السرج على ظهر الدابه، وذلك بلفه وشده حول بطن الدابه.
اما الصناب فهو عباره عن حبل يصنع من قطع القماش المفتوله، ويتستخدم لتثبيت السرج من الزحف الى الامام والخلف على ظهر الدابه، وذلك بتثبيته اسف ذيل الدابة


الصرار _ اللجام _ الخرتاية
وكلها تستخدم لمنع صغير الغنم من الرضاعه( عالم جبانات عايزين يحفظو اللبن لي عشاهم ويخلو المسكين ده بايت القوه)
الصرار : وهو عباره عن شريط من القماش بعرض يتراوح بين سنتميتر الى سنتمترين، وطول خمسة عشر سنتمتر تقريباً، ويدهن بفضلات البقر اللينه، ثم يلف حول حلمة ضرع النعجه او الغنمايه، وعندما يحاول الصغير لعق الحلمه يتذوق طعم فضلات البقر المغززه فينفر عن ضرع امه.
اما اللجام فهو عباره عن عود رفيه بطول عشر سنتمترات تقريباً ويربط بكل من طرفيه شريط من القماش بطول عشرون سنتمتر تقريباً، ويدخل العود داخل فم الصغير ( عتود او حمل) بحيث تكون اطرافه المربوط بها الاشرطه على جنبات حنك الصغير ثم تشد الى الاعلى بشكل متقاطع ( امام وجه الصغير) وتلف من خلف القرون وتربط مع بعض، وبذلك لا يستطيع الصغير لعق ضرع امه لان اللجام يعيق حركة فكيه.
اما الخرتاية فهى عباره عن كيس من القماش بطرفيه شريطين بطول مناسب، ويتم إدخال كلا الضرعين بداخلها ويتم ربطها بظهر الام ( غنمايه او نعجه) بواسطة الشريطين، وبذلك لا يستطيع الصغير ( عتود او حمل ) الوصول الى الضرع



الزير والتيبار
وكلاهما يصنع من الفخار
والاختلاف ان الزير يستخدم لحفظ وتبريد الماء للشرب
اما التيبار فيستخدم كإناء يوضع عليه العجين كى يتخمر



الكمشه والمفراكه والكنش
الكمشه معروفه بس الحناكيش سموها مغراف
اها المفراكه والكنش بيشبهو بعض
المفراكه تصنع من الخشب وتشتخدم لفرك الخضروات من خضره (شريفيه) وباميه (ام بقبق) بالاضافه الى الويكه وهى بمثابة الخضاض عند الحناكيش
اما الكنش فهو من الخشب ايضاً وهو عباره عن عود مستقيم يثبت فى مقدمته جزء ضغير على شكل هلال يثبت بشكل مقلوب، والكنش اكبر واغلظ وامتن من المفراكه ويستخدم فى صناعة العصيده (اللقمه)
المرحاكه او المحراكه او الرحى هى عباره عن قطعتين من الحجاره تستخدم لطحن الحبوب او بشرها ( تقشيرها) ذى اللوبيا وتكون قطعة الحجر السفلى اكبر حجماً والقطعه العليا اصغر يعني الكبرى طولها 70 سم والصغرى 20سم وتكون القطعه السفلى ثابته وتضع الحبوب على سطحها الذى يكون مسطحاً وتمرر القطعه الصغرى من فوقها جيئة وذهاباً حتى يتم الطحن
اما المعراكه فهي قطعه من القماش تستخدم لمسح صاج الكسره وفى مسحها هذا توزع الزيت او الطايوق على الصاج وفى نفس الوقت تزيل من سطح الصاج بقايا عجين واوساخ الطرقه السابقه
الدوكه بتختلف عن المعراكه
كان فى الجموعيه ولا التريس
طبعاً كلنا بنعرف صاج الكسره
عباره عن قطعه مربعه من الصاج .. صاح؟
وبنعرف طش اللقمه هو بيكون شكلو ذى قرفة الليمونه .
اها الدوكه دى بدل الواحد يشترى صاج للكسره وطش للعصيده ممكن يتعملو فيها الاتنين
يعني هى اقرب فى شكلها لطشت العصيده بس ما بتكون غريقه (عميقه) لى تحت يعني اقل تفلطحاً
الفرق بين الوقاية واللدايه
الوقايه عباره عن قطعه من القماس تفتل ثم تلف على شكل دائري وتوضع على الراس كوقايه له من المحمول عليه عند النساء فى اكثر الحالات يعني لمن تشوف ليك واحده شايله ليها صفيحه ومتوجه على الطاحونه عاين بين الصفيحه والراس. تجد الوقاية (ده كان زمان)
اما اللدايه فهى عباره عن حجر يوضع حول النار فيضع عليه القدر او الصاج او الطشت او الحله.


الفرده والفِركه
الفرده تصنع من خيوط القطن المغزوله ولونها ابيض مع خط ملون (ازرق غالباً) فى طرفها، واكثر من يلبسها الرجال كبار السن، كما انها تستخدم كغطاء اثنا النوم، وتعتبر منطقة شندى من اكبر المناطق التى تنتجها رغم ان القطن والغزل البلدى يتم شراءهم من الجزيره.
الفِركه وهى خاصة بالنساء وتمتاز بالالوان الفلكلوريه احمر واصفر وما بينهما وتكون ناعمة الملمس خيوطها حريرية ناعمه، وتستخدم فى المناسبات السعيده دوماً من ختان وزواج ونفاس



الدقلوب والدحلوب
الدقلوب ده عباره عن ضفدع فى طور مبكر
وبيكون لونه اسود وبيسبح بسرعه شديده داخل الماء
مستخدماً ذيله
اما الدحلوب
فهو انا (قِدر) من الفخار
وهو يستخدم للطبخ يعني ذى الحله.


السجم والرماد
الرماد معروف وهو مخلفات النار التى تبقي على الارض ويكون لونه مايل للابيض (رمادي)
والسجم (السكن عندالبعض) وهو مايعلق باسفل القدر الموضوع على النار ويكون لونه اسود.
الناس القُدام الجلاكين ما تتضايرو ابقو مارقين وهاتو العندكم.

اقعدو عافية
الرجوع الى أعلى الصفحة اذهب الى الأسفل
الهندي بشير نابري
قلم ذهبي
قلم ذهبي


عدد الرسائل : 2809
الاقامة : المملكة العربية السعودية - الريــاض
المهنة : Computer programmer
مزاجك اليوم :
تاريخ التسجيل : 08/09/2007

مُساهمةموضوع: رد: قـــديمك ... نديمـــك ..   الإثنين 26 نوفمبر 2007, 9:36 am

والله يارحال أوفيت وفعلا قديمك نديمك
ونحنا بالذات عندنا الكتير من المصطلحات الاستخدمها اهلنا في السابق لكن تكاد تكون اندثرت الان
مع المصطلحات الجديده الظهرت واصبحت كلمات الماضي شيئا من التراث ...
لك ودي يارائع على هذا المعجم الصغير ... وكن بخير أبد الدهر
الرجوع الى أعلى الصفحة اذهب الى الأسفل
http://aljraif.forumotion.com
ابو تراجى
قلم ذهبي
قلم ذهبي


عدد الرسائل : 903
مزاجك اليوم :
تاريخ التسجيل : 11/03/2008

مُساهمةموضوع: رد: قـــديمك ... نديمـــك ..   الأحد 04 مايو 2008, 3:17 pm

هى والله ماكنت قايلك مثقف قر كدة مع انك ود مدن !!!!

شن وراك دة كلو !!؟
داير نضيف شويه لو سمحت لنا
النخيل منها برضو العشميق وهومقترن فى الذكر مع السعف
والعشميق هذا ياسادتى مهم جداً عند اصحاب النخيل امثالنا بيصنع منو الحبال (الارى) كما يطلق عليه عندنا نحن الدناقلة يارحال وكما ليف يستعمل فى الحمام وله استخدامات اخرى

ولك تقدير وودى
ابوتراجى
الرجوع الى أعلى الصفحة اذهب الى الأسفل
ابو تراجى
قلم ذهبي
قلم ذهبي


عدد الرسائل : 903
مزاجك اليوم :
تاريخ التسجيل : 11/03/2008

مُساهمةموضوع: رد: قـــديمك ... نديمـــك ..   الأحد 04 مايو 2008, 3:20 pm

اسف بقصد النخلة وليس النخيل كما هو مكتوب فى الموضوع (اعجمى)

ابو تراجى
الرجوع الى أعلى الصفحة اذهب الى الأسفل
عبدالرحيم حطي
قلم ذهبي
قلم ذهبي


عدد الرسائل : 743
العمر : 43
الاقامة : بالمملكة العربية السعودية
المهنة : لا يهم
تاريخ التسجيل : 09/03/2008

مُساهمةموضوع: رد: قـــديمك ... نديمـــك ..   الإثنين 05 مايو 2008, 1:58 am

الاخ ايهاب


السلام عليكم ورحمة الله

الموضوع جميل لكن والله اصبح من الامس وعلى هذا يجب كل الاخوة أن يستفيدو منه والأن أخي ايهاب يوجد بالمنتدي اولاد لا يعرفون مثل هذا الموضوع والحبوبات المشلخات خلاص ماتن وذهبت معهن البركة .
مشكور
الرجوع الى أعلى الصفحة اذهب الى الأسفل
صديق النعمة الطيب
قلم فضي
قلم فضي


عدد الرسائل : 357
تاريخ التسجيل : 22/08/2008

مُساهمةموضوع: رد: قـــديمك ... نديمـــك ..   الثلاثاء 04 نوفمبر 2008, 6:21 am

رحلة رحال التراثية... ترى ما مصير هذا التراث و من المسؤول عن تنقيته و بعثه من جديد،أم أننا نخاف على أنوفنا من ذرات الغبار التي تراكمت عليه، عبر هذه النوافذ يمكن محاورة هذا التراث المتفرد تفرد بلادنا...
الرجوع الى أعلى الصفحة اذهب الى الأسفل
صديق النعمة الطيب
قلم فضي
قلم فضي


عدد الرسائل : 357
تاريخ التسجيل : 22/08/2008

مُساهمةموضوع: رد: قـــديمك ... نديمـــك ..   الثلاثاء 04 نوفمبر 2008, 6:21 am

رحلة رحال التراثية... ترى ما مصير هذا التراث و من المسؤول عن تنقيته و بعثه من جديد،أم أننا نخاف على أنوفنا من ذرات الغبار التي تراكمت عليه، عبر هذه النوافذ يمكن محاورة هذا التراث المتفرد تفرد بلادنا...
الرجوع الى أعلى الصفحة اذهب الى الأسفل
الطيب الامام الطيب
قلم ذهبي
قلم ذهبي


عدد الرسائل : 1225
العمر : 43
الاقامة : السعودية
المهنة : محاسب
مزاجك اليوم :
تاريخ التسجيل : 27/07/2008

مُساهمةموضوع: رد: قـــديمك ... نديمـــك ..   الثلاثاء 04 نوفمبر 2008, 9:10 am

الاخ رحال المبدع بى ابدع جريفى الحبيب موضوعك غاية الاهمية لجهل الاجيال الجديده بمثل هذه الاشياء التى لم يسمع او يشوفوها اجيال الثمانينات واقولك دمت لنا
الرجوع الى أعلى الصفحة اذهب الى الأسفل
عثمان خواجه
عضو جديد
عضو جديد


عدد الرسائل : 27
الاقامة : السعـــودية / القصيم
تاريخ التسجيل : 25/10/2008

مُساهمةموضوع: رد: قـــديمك ... نديمـــك ..   الثلاثاء 04 نوفمبر 2008, 3:21 pm

اخي إيهـــــاب.....
لك التحية و الاجـــــلال...
[size=24]وزي ماقالوا ( المـــــاعندو قديـــم ماعنـــــدو جديد)
( والنســـه قــــــديمو تـــــــــــــــاه )
نشـــكرك علي إطلالتـــك الطيبة هذه , وحقيقة أغلب جيل الزمن ده مايعرفون شئ عن الفـــردة والدحلوب والتيبار و الخرتاية والكراب والمخلايه وووووووووووووووووووووووووووووووووووووووو
وكنت عاوزك تتحدث لنا عن ( الســـحارة و القــطيع )
لك التحية أخي علي هذه الرحلة التراثيــة ذي ماقال أخونا صديق النعمة , وأنا اضم صــوتي ونداي له [/size
]((مامصيــــرهذا التــــراث ؟؟؟؟؟؟؟؟ ))
الرجوع الى أعلى الصفحة اذهب الى الأسفل
معز
قلم فضي
قلم فضي


عدد الرسائل : 330
الاقامة : السعودية/القصيم
تاريخ التسجيل : 09/01/2008

مُساهمةموضوع: رد: قـــديمك ... نديمـــك ..   الثلاثاء 04 نوفمبر 2008, 10:53 pm

اخونا ايهاب

تحياتنا الكتارات لك على قول ود سنقد

صراحة معلومات قيمة جدا خصوصا للحناكيش
وانا من موضوعك ده عرفت ليه معاوية السعف لقبوه بالسعف
واتمنى من اليوم ان يتم تعينك مشرف لقسم جديد يسمى التراث او تراثيات ولا رايكم شنو يا ادارة المنتدي

وكمان زواجك يا ايهاب رجعك ل 50 سنة يعنى لو دبلت (زوجتك ما تقراء الكلام ده ) ترجع مائة سنة و تدينا معلومات زيادة

موضوع شيق وجميل يجبرك على قراء ته لاخر حرف
ربنا يديك العافية
معز ود عبد المنعم
الرجوع الى أعلى الصفحة اذهب الى الأسفل
http://aljraif.forumotion.com
احمد عوض النمير
قلم ذهبي
قلم ذهبي


عدد الرسائل : 926
مزاجك اليوم :
تاريخ التسجيل : 16/03/2008

مُساهمةموضوع: رد: قـــديمك ... نديمـــك ..   الأربعاء 05 نوفمبر 2008, 12:35 am

رحال .....

انشاء الله طيب ...
اول شىء شكراً لهذه المعلومات..
الغريب فى الجيل الجديد دا موش ماعارفين الحاجات دى عشان ما لاقنها
ماعارفنها عشان ماعايزين اعرفوها عاملين فيها حناكيش وكشخه فى الفاضى...
تسلم للموضوع الجميل ....
الرجوع الى أعلى الصفحة اذهب الى الأسفل
عامر عبد الوهاب
مشرف
مشرف


عدد الرسائل : 656
العمر : 41
الاقامة : حبي الأول
المهنة : مقرر
مزاجك اليوم :
تاريخ التسجيل : 24/08/2008

مُساهمةموضوع: رد: قـــديمك ... نديمـــك ..   الأربعاء 05 نوفمبر 2008, 7:05 am

الاخ الغالي جدا ايهاب مشكور كتير على المعلومات الحلوه دي

ودمت لينا وكمان بثني كلام اخوي معز يكون في قسم للتراثيات
وانك تكون مشرف على القسم ده


أبو يارا
الرجوع الى أعلى الصفحة اذهب الى الأسفل
 
قـــديمك ... نديمـــك ..
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
............ :: المنتديات الرئيسية :: الجريف العـــــــام-
انتقل الى: