مكتوبي من شهر العسل شهر المرض شهر السجم

عندما تختلج الحنايا وتضيع النفس على دهاليز الواقع
أحمل قلمي الحزين وأرتحل عبر التخيــــال إلى دنياك
التي أحبهـــا وتأصلت في نفسي حتى غدت ذاتي

كانت هذه بداية القصة التي وقفت على حدقات العيون وأثارتها حتى تذرف الدموع
ودغدغت المشاعر في الجوف وهيجت الأحاسيس لينطلق العنان للقلب بالنبض
حزنــــاً ألمـــــاً ويتوه الخيــــــال في هذه الدنيـــــــــا المليئة بالآلام والأحزان
وحين تجد مصائب الناس تهون مصائبنـــــــا ...هناك من يحكي بالدموع
ومن يتلوى بالألم
حكايتي اليوم قصة واقعية من واقع حياة
أهلنـــــا الشايقية .. قصة البنية المسكينة التي تزوجت غصب عنهـــا الانسان الذي لم تحب
فكتبت رســـــــــــالة لمحبوبهــــا تحكي آلامهـــا واحزانها فعبرت وقالت

مكتوبي من شهر العسل شهر المرض شهر السجم
ملفوفة بيكفن الزفاف والحنة في إيدي دم

لتجعلك بهذا التعبير البليغ تتوه في أحضان الألــــــم
وسطرت لنـــا حكايتها من خيوط من ذهب .. لتترك فينـــا الحزن والألم
تابعو معي القصة الحزينة وتلك الرسالة التي لا تقاوم
وقوموا بتنزيل القصة بالصوت على لسان من ألقتهـــــا نيابة عنهـــا بكل أحاسيس الألم
ودعونــــا نتاعي القصة بالصوت والنص
ثم الحديث يطول حول هذه القضية التي مسّت الكثير من بناتنا اللاتي تزوجوا غضبــا عنهم

قم أولا بتحميل الملف الصوتي لتستمع لإلـــــقاء القصيدة بالصوت
وأضغط على كلمة download في الصفحة التي ستفتح لك
http://www.4shared.com/file/42296606/ca72d887/SAMHNY.html
ثم قم بتشغيل الملف وتابع النص لتعيش احساس تلك المظلومة

سامحني واصفح يا الحبيب ساقوني منك بالغصب
ندمان ليه سبتك براك أتباكى في نص الدرب
طمني حالك انت كيف والبي يهون مهم يكون صعب
أنا اصلي زول أحساسو مات من بدري معتاد الضرب

كم مره شانك يا مناي من حنضل الألم شربت
من خشمي تتقاطر دماي لو ينطق اسمك بالكذب
نفوني من نص الديار يوم ما عرفوا أنى ليك بحب
سجنوني بين أربع حيط زربوني من جهتك زرب

طـــالوني باليد والسان وما في شيتاً ما سلب
غير حبك ألماقدرو يوم يصلوه ما اصلوا ساكن القلب
اغرب شي أنى بي وراك بنزل وانهان وانضرب

لكني في لحظت ألقاك بنساه زي الكان لعب
وريتن أني أنا لي حبيب لو خنته بشعر بالذنب
ساقيني راويني المحبة ومن حناني كمان شرب

يا اخويا زي ريدتك ولادتدك برضي للمريود بحب
والله لو حاس بي العلي ما بترض بيتي أنا يتخرب
زي ما بتدور ليه السمح لي برضوا خير الدنيا حب

لكني القى الدايره وين من ناس معين خيرن نضب
دون شوره زي بيعة الملح باعوني في السوق بالجلب
وما راعو لامي الدوام تتبكاه شاني وتتحجب

باريت لي زول بالجته بس بارنك الروح والقلب
أنا قلبي لو فارق ضراك ما اظنو من بعدك كسب
متحمله الآلام براي شايله الهموم ما بتتحسب

ما لقيت لي زول حس العلي قاسمني همي معاي تعب
عرفت صح ألم الضرب ما بحسه زول غير الضرب
فوضت لله الأمر وكتين من االتحنيس غلبت

مظلومة والمظلوم دعوته من الله ما تحتجب
بكتبلك هسة يا الحبيب مصبره وماسكه القلم
بكتبلك هسه والقليب مجروح يعاني من الالم

مكتوبي من شهر العسل شهر المرض شهر السجم
ملفوفة بي كفن الزفاف والحنة في أيديه دم
مرقت من سجن الطغاه وقعت في الذل والوهم

وقبلت بي الواقع المرير وآمنت بي أمر القسم
وقبلت بي الدايرنو لي كم قبلي مظلوم انظلم
ويئست من عيشة عذاب رامياني في زول ما رحم

انسانه صرت بلا طموح بلا مبادئ بلا قيم
وقنعت من الرحمة تب بس فيك ما اتقطع العشم
ما زلت ياك مالك القليب رغم انو أمري أتحسم

لا زلت بفخر بيك واقول انت الحبيب في كل ملم
لا زلت بي اسمك باصيح لو حت ساكت اتهجم
وبقوله قدام إي زول ما خايفه اصلوا الموت هو كم

أخر رسالتي بطمنك أرجوك ما تشيل لي هم
خليك في عهدك معاي الباقي ما يضوق ليه هم
آخر رسالتي باطمنك أرجوك لاتشيل لي هم

خليك في عهدك معاي أرجاني ما تموت بالسأم
احفظني في جواك فرح بلسم تداويهو ألالم
زي حفظي لك بين الضلوع انت وقلبي جنب جنب

واخواني سيبن يفرحو أنا جرحي لسه ما التأم
يمكن ضميرهم يوم يحس ويعرف أنى أنا أتظلم
ويعود عشان يبنوا الوقع كيفن بي بنو الانهدم

ديل ناس هوايتم الظلم ديل خلوا عيشتي بلا طعم
ما سو بي حكم العقل ما بيندم البيه احتكم
الناس بتتقاس بي العقول ما بي الجلابيب والعمم
وأنا ماسكه في حبل الصبر في الله أملى ما اتعدم
وأنا ماسكه في حبل الصبر في الله أملى ما اتعدم

_________________

وقد أطلقت لكم عنــــــــــــــان الدموع مع مأساة تلك المظلومة

_________________

الناس بتتقاس بي العقول ما بي الجلابيب والعمم

_________________

اخوى ود الهندى

كيفنك عساك طيب ومسرور
يا اخوى مالك علينا تشيل وتبشتن فى حالنا
يا اخوى اترك القلوب فى اماكنها وتعال
داوى الجراح وانثر فينا الفرح بدل شلهتة المشاعر
دى ، وخلينا للغربة ومشاكلها .
اخى نصك حقيقى يبكى ولكن زى ما قال الفلاتى
دة ما على انا ده على الفارات ديل اصلوا عاملين
فيها هساسين وكده .
ولكن حنا عضلات تبش ومافى تريقة للبكاء
اهههههههههههههههههههههههههههه
يا اخوى جيب لينا حاجة تضحك اضحك الله
ايامك وابعد منك زواج الجبر ، قول امين

_________________
يعجبني الكريم من جلدو يكرم ضيفـو
ويعجبني الحليم يطـول حبالو بكيفـو
ويعجبني الحكيم بحـراً ممهد قيـفـو
وللفايت الحـدود أحمر مسلط سيفـو

ود العبيد انا كنت عايزك تخش على الرابط وتسمع
القصيدة من القاء البنت البتلقيها بصوتها الحزين
وكأنها صاحبة المأساة والمشكلة .. حقيقي بتنقلك بأسلوبها
وكلماتها الى عولم أخرى مليئة بالحزن والأسى
فالحزن فينا يملأ الأرجـــاء والانحاء وه>ا البوست اتكائة
لكي تهون مصائبنــــا علينا حين نرى مصائب الغير

ود العبيد يسعدني دوما وجودك فكن بقربي ما امكن ولك امتناني

_________________

عضو نشط عدد الرسائل: 54 تاريخ التسجيل: 16/01/2008

مشكووووووووووور ود نابري
جاري التحميل.........
نشوف الحاصل شنو ولنا عودة ليك يا جميل
حافظ ( تفلق وداوي ) تحياتي

والله يالهندى الغربة دى خلت القلب حجــــــــــــــــــــــــــــــــــــــر.. بكا مافى .. غايتو جارى التحميل ..كان جات بكية بناكله فى اللباد.

ههههههههه الزعيم اريتك تبقى طيب أخوي
ما ياه وده حال الدنيا يوم وجع ويوم فرح
لكن القصيدة دي انا وقف حوليها كتير شديد

_________________

احمد عوض الظاهر عليك أكلتها في اللباد فعلا
ههههههه انا غايتو ما بقدر وبكييت زمااااااااان
هههههههه تحياتي يا رائع وشكرا لكم والمرور

_________________

عساها الدمعة ما تمرق تحرق في قليب حزنان
عشان اتذكر اياموا يقول الحب طريق خسران
ولو اصلاً بديت انسي كنت نسيت وكنت زمان

(الباقي في دفتري لمن تجي بتشوفوا )

ودنابري مالك علينا الدموع كملناها مع ناس حجوجة
وزكريات الترترة وكدا .
معليش بكيت أقصد نسيت قصيدة مبابغة

_________________

حسبي من السلوي ....أنس النبض تسبيحاً ....
يصل ... على حصي الجبل الدكيك ...
وأمرغ الأعظام في شذراته أبكي منابع أدمعي واشق كبد الشعر فيك ..
فعساي ادرك كلب أهل الكهف منزلةً وأتبع عاشقيك ولعل ماجرحت أظافر زلتي ..
تمشي عليه يد المسيح ولعل بطن الحوت يلفظني .... الى البر الفسيح فاستريح ....

تسلم يا هندى

قصيدة قمة الروعة ، مكتوبه من شهر العسل شهر المرض شهر السجم
كان القصة كدى الناس دى كلها بدور المرض ،،، قايتو الضحك قتلنى عديل
......
.....
....
مسكينة ، ومظلومة ،وبقت بلا مبادى وبلا قيم ، وكان جابو اسمو ساكت قالت بتسوح ،،،

ده الكلام الحاصل على الناس ديل كلهم خاصتاً الناس البتقول ما ترجعنا للمواجع ناس حافظ ود االعبيد وناس اخناتون والجماعة الطيبين دايرين افرحو ...تفرحو كيف وشوفو البت الشايقة دى الشايلاهو فى قليبها هين .
مع تمنياتنا القلبية للجميع بان بشهر عسل عسل موش مرض والله يباعدنا من عرس الغصب
وبنجى راجعين

أخناتون كتب:

عساها الدمعة ما تمرق تحرق في قليب حزنان
عشان اتذكر اياموا يقول الحب طريق خسران
ولو اصلاً بديت انسي كنت نسيت وكنت زمان

(الباقي في دفتري لمن تجي بتشوفوا )

ودنابري مالك علينا الدموع كملناها مع ناس حجوجة
وزكريات الترترة وكدا .
معليش بكيت أقصد نسيت قصيدة مبابغة

اهااااااااااا رجعنا لأيام زمان والماضي الجميل
ودمعات في العيون ودقات قلب ليكم يحن
حجوجه مازال حجوجه وازايد شويتين كمان وبلغتين
لاحوله ولاقوة الا بالله ... والدفتر بس اكان ربنا
مد في العمر وطلق الضراع بأجيهو باجيهو
وشكرا ليهو أيها الأخناتون

_________________

ود مريم كتب:

تسلم يا هندى
قصيدة قمة الروعة ، مكتوبه من شهر العسل شهر المرض شهر السجم
كان القصة كدى الناس دى كلها بدور المرض ،،، قايتو الضحك قتلنى عديل

مع تمنياتنا القلبية للجميع بان بشهر عسل عسل موش مرض والله يباعدنا من عرس الغصب
وبنجى راجعين

سلامات يارائع سلامات
كدي قول آمين وكبر الفاتحه آمين آمين

_________________

UP

_________________

هندي شكلك قاعد تتفّن وتطلع في المدفّن !!
طبعا البوست ده قبل ما نسجل في المنتدى .. الزمن الجميل ..
وصراحة قصيدة في غاية الابداع .. ومع انها شعر الا انني متخيلها واقع معاش !!
واسوأ مافي الدنيا ان تسوقك الاقدار لعرس بالطريقة دي ..
لكين عشان تتطمن العرس ده بمش براهو .. موش قاعدين يقولوا "البيت ما نزل" فجأة حاتلقه نفسك حبيت وعرست وعملت فطور عرسك .. والحلفة ثم فجأةً بتكون عندك زولة كاملة حقتك براك ..
ثم تستمر الايام وتمتلك واحدة زي يارا ..
بعد شوية حاتقيف مع نفسك وتستغرب في هذه الحياه !!
المهم في تلك اللحظة لا تقف طويلا فقط عش اجمل اللحظات فالحياه اقصر من ان تحتمل الالم ..
وبحت وفتش واجرد وتعال تاني بي زي ده ...
تحياتي ،،، وحبي واحترامي ..

_________________
No body can go back to make a new begin , but every one can start from now to make a happy ending

يسلمووووو على القصه دي جدا رائعه ومؤثره لدرجه ما طبيعيه . يديك العافيه على الموضوع

المميز جدا. والواقع المررير الي بيحصل للاسف بسبب نقص التوعيه والعادات والتقاليد المتوارثه

من زمان وخوفا على البنات من العنوسه.

السلام عليكم
الموضوع مرة جميل
وإنشاء الله يصبر البنت
وشكرا

لا تعليق قمة في الروعة

_________________
عن شداد بن أوس عن النبي صلى الله عليه وسلم قال: "سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي، وأبوء لك بذنبي، فاغفر لي، فإنه لا يغفر الذنوب إلا أنت".
zaincof

عبدالله محمد نابري كتب:

هندي شكلك قاعد تتفّن وتطلع في المدفّن !!
طبعا البوست ده قبل ما نسجل في المنتدى .. الزمن الجميل ..
وصراحة قصيدة في غاية الابداع .. ومع انها شعر الا انني متخيلها واقع معاش !!
واسوأ مافي الدنيا ان تسوقك الاقدار لعرس بالطريقة دي ..
لكين عشان تتطمن العرس ده بمش براهو .. موش قاعدين يقولوا "البيت ما نزل" فجأة حاتلقه نفسك حبيت وعرست وعملت فطور عرسك .. والحلفة ثم فجأةً بتكون عندك زولة كاملة حقتك براك ..
ثم تستمر الايام وتمتلك واحدة زي يارا ..
بعد شوية حاتقيف مع نفسك وتستغرب في هذه الحياه !!
المهم في تلك اللحظة لا تقف طويلا فقط عش اجمل اللحظات فالحياه اقصر من ان تحتمل الالم ..
وبحت وفتش واجرد وتعال تاني بي زي ده ...
تحياتي ،،، وحبي واحترامي ..

صديقي عبدالله ... الماعندو قديم ماعندو جديد ولا شنو ياسيدي ...هههه
القصـــة أخذت مني وقفات كثيرة وتصنمت حيناً على اعتاب بحر تلك الأحران
التي سكنت تلك المسكينة .... أهلنـا الشوايقة ... حنين جدا وأشعارهم وقصصهم
تحكي عن واقع معاش في حياتهم غالباً ولا استبعد أن تكون صاحبة هذه القصيدة
تكتب بدمائها عن جراحاتهـا .. فقط دعنا مع الحلم الجميل ياعزيزي وخلينا منتظرين البيت
ده جاي نازل من وين وشكلو كيف ؟ هههههههه
سامق امنياتي ياعبدو بأمنيات محققه .. وكن بالقرب قدر المستطاع
فلوجودك سحر خـاص

_________________

Dr.Saly.Ga كتب:

يسلمووووو على القصه دي جدا رائعه ومؤثره لدرجه ما طبيعيه . يديك العافيه على الموضوع
المميز جدا. والواقع المررير الي بيحصل للاسف بسبب نقص التوعيه والعادات والتقاليد المتوارثه
من زمان وخوفا على البنات من العنوسه.

دكتوره ســالي وأنتي ممّن أحسّوا أنين تلك المظلومـة .. شكرا لتواجدك العطـر
أما عن نقص التوعية فهذا واقع مر فعلا نعيشة عسانا نسـلم من تبعاته وثغراته التي
تصيب من مأتم دوماً ... أما الخوف على البنات من العنوسة فهذا عالم آخر دعينا
نفرد له مساحة في مكان به شئ من فرح بعيدا عن الدموع التي أمارسـها هاهنـا
شكرا سيدتي على مرورك

_________________